നെടുമ്പാശേരി: നെടുമ്പാശേരി രാജ്യാന്തര വിമാന താവളം വഴി കടത്താൻ ശ്രമിച്ച 65 ലക്ഷം രൂപയുടെ സ്വർണം പിടികൂടി. വിദേശത്ത് നിന്നും എത്തിയ ഒരു സ്ത്രീ ഉൾപ്പെടെ രണ്ടുപേരെ എയര്‍ കസ്റ്റംസ് ഇന്റലിന്‍ജന്‍സ് വിഭാഗമാണ് പിടികൂടിയത്.
രണ്ട് യാത്രക്കാരില്‍ നിന്നായി 65 ലക്ഷം വിലവരുന്ന 1320 ഗ്രാം സ്വര്‍ണ്ണമാണ് പിടികൂടിയത്. എയർ അറേബ്യ വിമാനത്തിൽ ഷാർജയിൽനിന്നും കുടുംബത്തോടൊപ്പം എത്തിയ ചെറുതുരുത്തി സ്വദേശിയായ സ്ത്രീ 570 ഗ്രാം സ്വർണമാണ് കടത്താൻ ശ്രമിച്ചു പിടിയിലായത്. വസ്ത്രം കൊണ്ട് ഒളിപ്പിച്ചാണ് ഇയാള്‍ സ്വര്‍ണ്ണം കടത്തുവാന്‍ ശ്രമിച്ചത്.
ഗോ-എയർ വിമാനത്തിൽ ഷാർജയിൽനിന്നും എത്തിയ മലപ്പുറം സ്വദേശിയിൽനിന്നും 750 ഗ്രാം സ്വർണമാണ് പിടിച്ചെടുത്തത്. സ്വര്‍ണ്ണ മിശ്രിതമാക്കി മൂന്ന് കാപ്സ്യൂൾ രൂപത്തിലാക്കി മലദ്വാരത്തിൽ ഒളിപ്പിച്ചാണ് ഇവർ സ്വര്‍ണ്ണം കടത്തിക്കൊണ്ടുവന്നത്. ഇരുവരെയും കസ്റ്റഡിയില്‍ എടുത്ത് ചോദ്യം ചെയ്ത് വരുന്നു.
