ബംഗളൂരു: പ്രധാനമന്ത്രി നരേന്ദ്ര മോദിയുടെ കർണാടക സന്ദർശനത്തിനിടെയുണ്ടായ ഗുരുതരമായ സുരക്ഷാവീഴ്ചയിൽ ഒരു സബ് ഇൻസ്പെക്ടർ ഉൾപ്പെടെ ആറ് പൊലീസ് ഉദ്യോഗസ്ഥരെ സർവീസിൽ നിന്നും സസ്പെൻഡ് ചെയ്തു. പ്രധാനമന്ത്രി സന്ദർശിച്ച ആർട്ട് ഓഫ് ലിവിങ് ഫൗണ്ടേഷൻ കേന്ദ്രത്തിന് സമീപമുള്ള പാതയോരത്ത് നിന്നും സ്ഫോടകവസ്തുക്കൾ കണ്ടെത്തിയ സംഭവത്തിലാണ് നടപടി. സംഭവം നടന്ന് രണ്ടാഴ്ചയ്ക്ക് ശേഷം ബംഗളൂരു സൗത്ത് എസ്പി ആർ. ശ്രീനിവാസ് ഗൗഡയാണ് സുരക്ഷാചുമതലയിൽ വീഴ്ചവരുത്തിയ ഉദ്യോഗസ്ഥരെ സസ്പെൻഡ് ചെയ്ത് ഉത്തരവിറക്കിയത്. എന്നാൽ സസ്പെൻഷനിലായ ഉദ്യോഗസ്ഥരുടെ പേരുകൾ പൊലീസ് ഔദ്യോഗികമായി പുറത്തുവിട്ടിട്ടില്ല.
മേയ് 10-നായിരുന്നു പ്രധാനമന്ത്രി നരേന്ദ്രമോദി ബംഗളൂരുവിലെ ആർട്ട് ഓഫ് ലിവിങ് കേന്ദ്രം സന്ദർശിച്ചത്. ഈ കേന്ദ്രത്തിൽ നിന്നും ഏകദേശം രണ്ട് കിലോമീറ്റർ മാത്രം അകലെയുള്ള കുപ്പറെഡ്ഡി കെരെക്ക് സമീപത്തുനിന്നാണ് സ്ഫോടകവസ്തുക്കൾ അടങ്ങിയ പെട്ടി കണ്ടെടുത്തത്. പ്രധാനമന്ത്രിയുടെ വാഹനവ്യൂഹം കടന്നുപോകുന്നതിന് വെറും ഒന്നര മണിക്കൂർ മുമ്പ് മാത്രമാണ് ഡ്യൂട്ടിയിലുണ്ടായിരുന്ന കോൺസ്റ്റബിൾ ഈ ബോക്സ് ശ്രദ്ധിക്കുന്നത്. പ്രധാന റോഡിൽ നിന്നും 25 അടി മാറി ഒരു സ്വകാര്യ വ്യക്തിയുടെ ഉടമസ്ഥതയിലുള്ള സ്ഥലത്തെ മതിലിനോട് ചേർന്നാണ് സംശയാസ്പദമായ രീതിയിൽ കാർട്ടൻ ബോക്സ് കിടന്നിരുന്നത്. തുടർന്ന് നടത്തിയ പരിശോധനയിൽ ബോക്സിനുള്ളിൽ രണ്ട് ജലാറ്റിൻ സ്റ്റിക്കുകൾ, തീപ്പെട്ടി, കർപ്പൂരം, ബാറ്ററികൾ, കണക്റ്റിങ് വയറുകൾ, ഒരു റിയൽ ടൈം ക്ലോക്ക്, എൽസിഡി ഡിസ്പ്ലേ എന്നിവ കണ്ടെത്തുകയായിരുന്നു.
സംഭവത്തിന് പിന്നിൽ പ്രവർത്തിച്ച പ്രതികളെ കണ്ടെത്താനായി കർണാടകയുടെ അതിർത്തി ജില്ലകളിലേക്കും അയൽ സംസ്ഥാനങ്ങളായ തമിഴ്‌നാട്, ആന്ധ്രാപ്രദേശ് എന്നിവിടങ്ങളിലേക്കും പ്രത്യേക പോലീസ് സംഘങ്ങളെ നിയോഗിച്ച് അന്വേഷണം വ്യാപിപ്പിച്ചിട്ടുണ്ടെങ്കിലും ഇതുവരെയും പ്രതികളെക്കുറിച്ച് വ്യക്തമായ സൂചനകളൊന്നും ലഭിച്ചിട്ടില്ല. അതേസമയം, കണ്ടെടുത്ത വസ്തുക്കളിൽ നിന്ന് അടിയന്തരമായി യാതൊരുവിധ സുരക്ഷാഭീഷണിയും ഉണ്ടായിരുന്നില്ലെന്നാണ് ഫോറൻസിക് ലാബിൽ നിന്നും ലഭിച്ച റിപ്പോർട്ടിൽ പറയുന്നത്. കാർട്ടൻ ബോക്സിലുണ്ടായിരുന്ന ജലാറ്റിൻ സ്റ്റിക്കുകൾക്ക് മൂന്ന് വർഷത്തോളം പഴക്കമുണ്ടായിരുന്നുവെന്നും ടൈമർ പ്രവർത്തനരഹിതമായിരുന്നുവെന്നും ബോക്സിനുള്ളിൽ ഡിറ്റണേറ്റർ ഉണ്ടായിരുന്നില്ലെന്നും ഫോറൻസിക് റിപ്പോർട്ട് വ്യക്തമാക്കുന്നു. എങ്കിലും രാജ്യത്തെ ഏറ്റവും ഉയർന്ന വിവിഐപി സുരക്ഷാ പ്രോട്ടോക്കോളിൽ ഉണ്ടായ വീഴ്ചയെ അതീവ ഗൗരവത്തോടെയാണ് അധികൃതർ കാണുന്നത്.
