ചെന്നൈ: തമിഴ് സിനിമാ താരങ്ങളുടെ സംഘടനയായ ‘നടികർ’ സംഘത്തിന്റെ പേരിൽ വ്യാജന്മാർ പണപ്പിരിവ് നടത്തുന്നതായി പരാതി. നടികർ സംഘത്തിന്റെ ഉടമസ്ഥതയിൽ ചെന്നൈ ടി നഗറിലുള്ള സ്ഥലത്ത് കെട്ടിടംനിർമിക്കുന്നതിന് പണം വേണമെന്നുപറഞ്ഞ് പിരിവുനടത്തുന്നുവെന്നാണ് സംഘടനാപ്രസിഡന്റും നടനുമായ നാസർ, ചെന്നൈ സിറ്റി പോലീസിൽ നൽകിയ പരാതിയിൽ പറയുന്നത്. നാസറിന്റെ പേരിലാണ് പലർക്കും അഭ്യർഥന അയയ്ക്കുകയും പണംവാങ്ങുകയും ചെയ്യുന്നത്.
ഏഴ് വർഷം മുമ്പാണ് ടി നഗറിൽ നടികർ സംഘം കെട്ടിടസമുച്ചയത്തിന്റെ നിർമ്മാണം ആരംഭിച്ചത്. എന്നാൽ, കോവിഡിനെ തുടർന്ന് പണി മുടങ്ങുകയായിരുന്നു. പിന്നീട് വിജയ്, കമൽഹാസൻ, തമിഴ്‌നാട് കായികമന്ത്രി ഉദയനിധി സ്റ്റാലിൻ തുടങ്ങിയവർ ഒരോ കോടി രൂപ വീതം നൽകിയതോടെ ഈയടുത്താണ് കെട്ടിടത്തിന്റെ പണി പുനരാരംഭിക്കാൻ തീരുമാനിച്ചത്. ഇതിനിടയിലാണ് തട്ടിപ്പുനടക്കുന്നതായി ശ്രദ്ധയിൽപ്പെട്ടത്.
