പെരുമ്പാവൂര്‍: ഒരു സ്റ്റാന്റിലെ അഞ്ചു ഓട്ടോ തൊഴിലാളികളുടെ ഒരുമിച്ചുള്ള പോരാട്ടം ഈ തെരഞ്ഞെടുപ്പിലെ അപൂര്‍വ്വ കാഴ്ചകളിലൊന്നാണ്‌. എറണാകുളം ജില്ലയില്‍ വാഴക്കുളം ഗ്രാമപഞ്ചായത്ത് മാറമ്പിള്ളി ഓട്ടോ സ്റ്റാന്റിലെ തൊഴിലാളികളാണ് പോരാട്ടത്തിന് ഇറങ്ങിയിരിക്കുന്നത്. പഞ്ചായത്തിലെ ഒന്നും രണ്ടു വാര്‍ഡുകളിലായി രണ്ടു സിപിഐ സ്ഥാനാര്‍ത്ഥികളും രണ്ട് ബിജെപി സ്ഥാനാര്‍ത്ഥികളും ഒരു സ്വതന്ത്രസ്ഥാനാര്‍ത്ഥിയുമാണ് തെരഞ്ഞെടുപ്പ് മത്സരത്തിനുള്ളത്.
ആരു ജയിച്ചാലും ജനനന്മയ്ക്ക് വേണ്ടിയുള്ള പ്രവര്‍ത്തനങ്ങളില്‍ ഒരുമിച്ചുണ്ടാകുമെന്ന് ഇവര്‍ ഓരോരുത്തരും പറയുന്നു. ഒന്നാം വാര്‍ഡില്‍ ഇടതു സ്ഥാനാര്‍ത്ഥിയായ അന്‍സാര്‍ അലിക്കെതിരെ എന്‍ഡിഎ സ്ഥാനാര്‍ത്ഥിയായ സൗദീഷ് ജനവിധി തേടുന്നു. രണ്ടാം വാര്‍ഡില്‍ എല്‍ഡിഎഫ് സ്ഥാനാര്‍ത്ഥി കെഎസ് അബ്ദുള്‍ ഹമീദിനെതിരെ ബിജെപിയുടെ ശ്രീദേവനാണ് മത്സരരംഗത്തുള്ളത്. സിയാദ് സ്വതന്ത്രസ്ഥാനാര്‍ത്ഥിയാണ്. മാറമ്പിള്ളി ഓട്ടോ തൊഴിലാളി സാധുസംരക്ഷണ സമിതി വഴി കഴിഞ്ഞ പന്ത്രണ്ട് വര്‍ഷം കൊണ്ട് 22 ലക്ഷം രൂപയുടെ ജനസഹായ പ്രവര്‍ത്തനങ്ങള്‍ സംഘടിപ്പിച്ച പാരമ്പര്യവും ഈ ഓട്ടോകുടുംബത്തിന്റെ നേട്ടമാണ്‌. ചികിത്സാ സഹായം, സാധുസംരക്ഷണം, രക്തദാനം എന്നിങ്ങനെയുള്ള പ്രവര്‍ത്തനങ്ങളാണ് ഇവര്‍ നടപ്പാക്കിയത്. രണ്ടാം വാര്‍ഡില്‍ മത്സരിക്കുന്ന സിപിഐ നേതാവ് കെഎസ് അബ്ദുള്‍ ഹമീദിന്റെ നേതൃത്വത്തില്‍ 2008 ലായിരുന്നു സമിതിയുടെ തുടക്കം.
