തിരുവനന്തപുരം: കേരളത്തിൽ ജി എസ് ടിക്ക് പകരം നടപ്പിലാക്കുന്നത് വീണാ സർവീസ് ടാക്സ് എന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. പിണറായി എപ്പോഴൊക്കെ വീഴാൻ തുടങ്ങുന്നുവോ അപ്പോഴൊക്കെ പ്രതിപക്ഷം ഒരു കൈ സഹായം നൽകുന്നു. ജനവികാരം മറികടക്കാൻ പിണറായിയും വി ഡി സതീശനും ചേർന്ന് നിയമസഭ പൂട്ടിയെന്ന് അദ്ദേഹം പറഞ്ഞു. ബിജെപിയുടെ നേതൃത്വത്തിൽ നിയമസഭയ്ക്ക് മുൻപിൽ നടക്കുന്ന മാർച്ചിൽ സംസാരിക്കുകയായിരുന്നു അദ്ദേഹം.
അതേസമയം, മിത്ത് വിവാദത്തിൽ സ്പീക്കർ വിശ്വാസികളോട് മാപ്പ് പറയണമെന്ന് ആവശ്യപ്പെട്ട് നിയമസഭയ്ക്ക് മുൻപിൽ നാമജപഘോഷയാത്ര ആരംഭിച്ചു. യുഡിഎഫ് സിപിഎമ്മുമായി ചേർന്ന് പ്രശ്നം ഒത്തുതീർപ്പാക്കിയെന്ന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ ആരോപിച്ചിരുന്നു. ഹിന്ദുക്കളുടെ പ്രധാന ദൈവമായ ഗണപതിയെ അധിക്ഷേപിച്ചിട്ടും പ്രതിപക്ഷത്തിന് അനക്കമില്ല. കാക്ക ചത്താൽ പോലും നിയമസഭയിൽ അടിയന്തര പ്രമേയ നോട്ടീസ് നൽകുന്ന പ്രതിപക്ഷം ഹിന്ദുക്കളുടെ പ്രധാന ദൈവമായ ഗണപതിയെ അധിക്ഷേപിച്ചിട്ടും നോട്ടീസ് കൊടുക്കാൻ തയ്യാറാവാത്തത് വോട്ട്ബാങ്ക് രാഷ്ട്രീയ താത്പര്യമുള്ളത് കൊണ്ടാണെന്ന് അദ്ദേഹം ആരോപിച്ചിരുന്നു.