ബെംഗളുരു: രാഹുൽ ഗാന്ധി വയനാട്ടിൽ മത്സരിക്കുമ്പോൾ ദക്ഷിണേന്ത്യക്കു മുഴുവൻ ഗുണംചെയ്യുമെന്ന കോൺഗ്രസിന്‍റെ വാദം തള്ളി ജെഡിഎസ് അധ്യക്ഷൻ എച്ച് ഡി ദേവഗൗഡ. കേരളത്തിൽ മത്സരിക്കുന്നതിവന്‍റെ പേരിൽ കർണ്ണാടകത്തിൽ രാഹുൽ തരംഗം ഇല്ലെന്നും ദേവഗൗഡ പറഞ്ഞു.
കോൺഗ്രസുമായുള്ള സഖ്യത്തിന്‍റെ ഭാവി തെരഞ്ഞെടുപ്പ് ഫലം നിശ്ചയിക്കുമെന്നും ദേവഗൗഡ പറഞ്ഞു. രാഹുലിന്‍റെ വയനാട്ടിലെ സ്ഥാനാർത്ഥിത്വം ദക്ഷിണേന്ത്യക്ക് ആവേശം പകരുമെന്നായിരുന്നു കോൺഗ്രസിന്‍റെ വാദം. രാഹുൽ വയനാട്ടിൽ മത്സരിക്കുന്നതോടെ കർണ്ണാടകത്തിലും തമിഴ്നാട്ടിലും ഉണർവ് ഉണ്ടാകുമെന്നും കോൺഗ്രസ് വാദിച്ചു. എന്നാൽ ഇതിനെയാണ് ദേവഗൗഡ തള്ളിയിരിക്കുന്നത്.
കേരളത്തിൽ തരംഗം ഉണ്ടാക്കിയേക്കാമെന്നല്ലാതെ മറ്റ് സംസ്ഥാനങ്ങിളിൽ രാഹുലിന്‍റെ വയനാടൻ സ്ഥാനാർത്ഥിത്വം ഗുണം ചെയ്യില്ലെന്നാണ് കോൺഗ്രസിന്‍റെ സഖ്യകക്ഷിയായ ജെഡിഎസ് അധ്യക്ഷന്‍റെ അഭിപ്രായം. തെരഞ്ഞെടുപ്പിന് ശേഷം കോൺഗ്രസുമായുള്ള സഖ്യത്തിന്‍റെ കാര്യത്തിൽ ദേവഗൗഡ ഉറപ്പുനൽകിയില്ല. നേതാക്കൾ നിർബന്ധിച്ചതുകൊണ്ടാണ് മത്സരിക്കുന്നതെന്നും ദേവഗൗഡ വ്യക്തമാക്കി.
