ബെംഗളൂരു: സംസ്ഥാനത്തെ ഉന്നത വിദ്യാഭ്യാസ സ്ഥാപനങ്ങൾ കേന്ദ്രീകരിച്ച് വിദ്യാർത്ഥികൾക്കായി വ്യാപക എച്ച്.ഐ.വി പരിശോധനയും കൗൺസിലിംഗും നടത്താൻ കർണാടക സർക്കാരിന്റെ നിർണായക തീരുമാനം. രാജ്യത്ത് എച്ച്.ഐ.വി ബാധിതരുടെ എണ്ണത്തിൽ കർണാടകം മൂന്നാം സ്ഥാനത്താണെന്ന നാഷണൽ എയിഡ്സ് കൺട്രോൾ ഓർഗനൈസേഷന്റെ (NACO) കണ്ടെത്തലിന് പിന്നാലെയാണ് ഈ നടപടി. കർണാടക സ്റ്റേറ്റ് എയ്ഡ്സ് പ്രിവൻഷൻ സൊസൈറ്റിയുടെ അഭ്യർത്ഥന മാനിച്ച് വിശ്വേശ്വരയ്യ ടെക്നോളജിക്കൽ യൂണിവേഴ്സിറ്റിയും കോളേജിയറ്റ് എഡ്യൂക്കേഷൻ ഡിപ്പാർട്ട്മെന്റും ഇതിനായുള്ള പ്രവർത്തനങ്ങൾ ആരംഭിച്ചുകഴിഞ്ഞു. പരിശോധനയിൽ പങ്കാളികളാകുന്ന വിദ്യാർത്ഥികളുടെ സ്വകാര്യത സമ്പൂർണ്ണമായി സംരക്ഷിക്കുന്നതിനായി ‘Know Your HIV Status’ എന്ന പേരിൽ പ്രത്യേക ക്യു.ആർ അധിഷ്ഠിത മൊബൈൽ ആപ്പും ആരോഗ്യ വകുപ്പ് തയ്യാറാക്കുന്നുണ്ട്.
യൂണിവേഴ്സിറ്റി ഗ്രാന്റ്സ് കമ്മീഷന്റെയും കേന്ദ്ര വിദ്യാഭ്യാസ മന്ത്രാലയത്തിന്റെയും നിർദ്ദേശപ്രകാരം കോളേജുകളിൽ സംഘടിപ്പിക്കുന്ന പ്രത്യേക ഹെൽത്ത് ക്യാമ്പുകൾ വഴിയാകും പരിശോധനയും ബോധവൽക്കരണവും കൗൺസിലിംഗും നടപ്പിലാക്കുക. പദ്ധതിയുമായി പൂർണ്ണമായി സഹകരിക്കാൻ എല്ലാ എൻജിനീയറിംഗ്, ആർട്സ്, സയൻസ് കോളേജ് പ്രിൻസിപ്പൽമാർക്കും ആരോഗ്യവകുപ്പ് നിർദ്ദേശം നൽകിയിട്ടുണ്ട്. യുവാക്കൾക്കിടയിൽ ലഹരിമരുന്നിന്റെ ഉപയോഗവും സുരക്ഷിതമല്ലാത്ത ലൈംഗിക ബന്ധങ്ങളും വർദ്ധിച്ചതാണ് രോഗബാധ ഉയരാൻ പ്രധാന കാരണമായി വിലയിരുത്തപ്പെടുന്നത്. രോഗം മുൻകൂട്ടി തിരിച്ചറിയുന്നതിലൂടെ രോഗവ്യാപനം തടയാനും കൃത്യമായ ചികിത്സ നൽകാനും സാധിക്കുമെന്നാണ് പ്രതീക്ഷിക്കുന്നത്.
നിലവിലെ കണക്കുകൾ പ്രകാരം കർണാടകയിൽ 2.6 ലക്ഷത്തോളം എച്ച്.ഐ.വി ബാധിതരുണ്ട്. ഇതിൽ 54,000-ത്തോളം ആളുകൾ തങ്ങൾക്ക് രോഗബാധയുണ്ടെന്ന വിവരം പോലും അറിയാത്തവരാണ്. 18 മുതൽ 35 വരെ പ്രായമുള്ള യുവാക്കളിലാണ് രോഗവ്യാപനം അതിവേഗം കൂടുന്നത്. 2023-24 കാലഘട്ടത്തിൽ ഈ പ്രായപരിധിയിലുള്ള 44,500 പേർക്കാണ് എച്ച്.ഐ.വി സ്ഥിരീകരിച്ചതെങ്കിൽ 2025-26 ആയപ്പോഴേക്കും ഇത് 66,000 ആയി കുത്തനെ ഉയർന്നു. 18-നും 25-നും ഇടയിൽ പ്രായമുള്ള 7,000 പേർ സംസ്ഥാനത്ത് നിലവിൽ രോഗബാധിതരായി ഉണ്ടെന്നും കണക്കുകൾ വ്യക്തമാക്കുന്നു. ഈ ആശങ്കാജനകമായ സാഹചര്യം മുൻനിർത്തിയാണ് ക്യാമ്പസുകൾ കേന്ദ്രീകരിച്ചുള്ള ശക്തമായ പ്രതിരോധ നടപടികളിലേക്ക് സർക്കാർ കടന്നിരിക്കുന്നത്.
