ദില്ലി : തീർത്ഥാടനത്തിനായി പാകിസ്ഥാനിലേക്ക് പോവുകയും പിന്നീട് അവിടെ വെച്ച് മതം മാറി വിവാഹം കഴിക്കുകയും ചെയ്ത ഇന്ത്യൻ യുവതി സരബ്ജീത് കൗറിന്റെ ദയനീയാവസ്ഥ വെളിപ്പെടുത്തുന്ന ശബ്ദരേഖ പുറത്ത്. തനിക്ക് വലിയൊരു പിഴവ് സംഭവിച്ചെന്നും ഇന്ത്യയിലുള്ള തന്റെ മക്കളുടെ അടുത്തേക്ക് എത്രയും വേഗം മടങ്ങണമെന്നും കരഞ്ഞുകൊണ്ട് അപേക്ഷിക്കുന്ന സരബ്ജീതിന്റെ ഓഡിയോ ക്ലിപ്പാണ് ഇപ്പോൾ സമൂഹ മാദ്ധ്യമങ്ങളിൽ പ്രചരിക്കുന്നത്. ഇന്ത്യയിലുള്ള തന്റെ ഭർത്താവുമായി സംസാരിക്കുന്ന രീതിയിലുള്ള ഈ സന്ദേശത്തിൽ, പാകിസ്ഥാനിലെ തന്റെ ജീവിതം അങ്ങേയറ്റം ദുസ്സഹമാണെന്നും ഓരോ ചില്ലിക്കാശിനും വേണ്ടി താൻ കഷ്ടപ്പെടുകയാണെന്നും അവർ വ്യക്തമാക്കുന്നുണ്ട്.
കഴിഞ്ഞ നവംബർ നാലിന് സിഖ് തീർത്ഥാടക സംഘത്തോടൊപ്പമാണ് സരബ്ജീത് പാകിസ്ഥാനിലെ നങ്കണ സാഹിബ് സന്ദർശിക്കാൻ പോയത്. നവംബർ 13-ന് സംഘത്തോടൊപ്പം തിരികെ വരേണ്ടിയിരുന്ന അവരെ പിന്നീട് കാണാതാവുകയായിരുന്നു. ദിവസങ്ങൾക്കുള്ളിൽ അവർ ഇസ്ലാം മതം സ്വീകരിച്ചതായും നൂർ ഹുസൈൻ എന്ന പേര് സ്വീകരിച്ച് ലാഹോറിനടുത്തുള്ള ഷെയ്ഖുപുര സ്വദേശി നാസിർ ഹുസൈനെ വിവാഹം കഴിച്ചതായും സ്ഥിരീകരിക്കുന്ന വാർത്തകൾ പുറത്തുവന്നു. എന്നാൽ ഇപ്പോൾ പുറത്തുവന്ന ശബ്ദരേഖ പ്രകാരം, താൻ അവിടെ വലിയ രീതിയിലുള്ള മാനസിക വിഷമങ്ങളും പീഡനങ്ങളും അനുഭവിക്കുന്നുണ്ടെന്നാണ് സരബ്ജീത് പറയുന്നത്. തനിക്ക് ധരിക്കാൻ പോലും ശരിയായ വസ്ത്രങ്ങളില്ലെന്നും ആരോ തന്നെ ഉപദ്രവിക്കുന്നുണ്ടെന്നും അവർ വെളിപ്പെടുത്തുന്നു.
ജനുവരി ആറിന് സരബ്ജീതിനെ വാഗ അതിർത്തി വഴി ഇന്ത്യയിലേക്ക് നാടുകടത്താൻ പാക് അധികൃതർ തീരുമാനിച്ചിരുന്നെങ്കിലും അവസാന നിമിഷം ഈ നടപടി റദ്ദാക്കി. രേഖകളിലെ സാങ്കേതിക പ്രശ്നങ്ങളാണ് ഇതിന് കാരണമായി പാക് മാദ്ധ്യമങ്ങൾ ചൂണ്ടിക്കാട്ടുന്നത്. തീർത്ഥാടന വിസയുടെ കാലാവധി അവസാനിച്ചതിനാൽ നിലവിൽ നിയമപരമായ അനുമതിയില്ലാതെയാണ് അവർ അവിടെ കഴിയുന്നത്. സരബ്ജീതിന്റെ സുരക്ഷയെക്കുറിച്ചും അവരുടെ സമ്മതപ്രകാരമാണോ ഈ വിവാഹം നടന്നതെന്നതിനെക്കുറിച്ചും ഇപ്പോൾ വലിയ ആശങ്കകളാണ് ഉയരുന്നത്.
പുറത്തുവന്ന ശബ്ദരേഖയുടെ ആധികാരികത ഔദ്യോഗികമായി സ്ഥിരീകരിക്കപ്പെട്ടിട്ടില്ലെങ്കിലും സരബ്ജീതിന്റെ വെളിപ്പെടുത്തലുകൾ ഗൗരവകരമായ നയതന്ത്ര ചർച്ചകൾക്ക് വഴിവെച്ചിട്ടുണ്ട്. പാകിസ്താൻ അധികൃതരോ ഇന്ത്യൻ വിദേശകാര്യ മന്ത്രാലയമോ ഈ വിഷയത്തിൽ ഇതുവരെ ഔദ്യോഗിക പ്രതികരണം നടത്തിയിട്ടില്ല. തന്റെ മക്കളെ വളർത്താൻ തനിക്ക് സാധിച്ചില്ലെന്നും അവരെ കാണാൻ അതിയായി ആഗ്രഹിക്കുന്നുണ്ടെന്നും പറയുന്ന സരബ്ജീതിന്റെ നിലവിളി സിഖ് സമൂഹത്തിനിടയിലും വലിയ പ്രതിഷേധത്തിന് കാരണമായിട്ടുണ്ട്. നങ്കണ സാഹിബ് ഗുരുദ്വാര അധികൃതരെ സമീപിച്ച് സഹായം തേടാൻ ഇന്ത്യയിലുള്ള ഭർത്താവ് സരബ്ജീതിനെ ഉപദേശിക്കുന്നുണ്ടെങ്കിലും അവരുടെ മോചനം ഇപ്പോഴും അനിശ്ചിതത്വത്തിലാണ്.
