തെരുവിലൂടെ കൈകോര്‍ത്ത് നടന്നതിനും സ്നേഹപ്രകടനം നടത്തിയതിനും പരസ്യമായി ചാട്ടവാറടി ശിക്ഷ നല്‍കി ഇന്‍ഡോനേഷ്യയിലെ ആഛേ പ്രവിശ്യാ കോടതി. കഴിഞ്ഞ വ്യാഴാഴ്ചയാണ് ശിക്ഷാ വിധി നടപ്പാക്കിയത്. നാലുമുതല്‍ 22 അടിവരെയാണ് ഓരോരുത്തരും ഏറ്റുവാങ്ങിയത്. പ്രദേശത്തെ മോസ്കിനു മുന്‍പില്‍ പ്രത്യേകം കെട്ടിയുയര്‍ത്തിയ സ്റ്റേജിലായിരുന്നു ശിക്ഷ നടപ്പാക്കിയത്.
ശിക്ഷ നടപ്പാക്കുന്നത് കാണാന്‍ കുട്ടികള്‍ ഉള്‍പ്പടെ നൂറുകണക്കിന് പേര്‍ സ്ഥലത്തെത്തിയിരുന്നു. ഇസ്ലാമിക നിയമങ്ങള്‍ കര്‍ശനമായി നടപ്പാക്കുന്ന ആഛേ പ്രവിശ്യയില്‍ താലിബാന്‍ -ഐ.എസ് മേഖലകളില്‍ നടപ്പാക്കുന്ന നിയമവ്യവസ്ഥക്കു സമാനമായ അന്തരീക്ഷമാണ് നിലവിലുള്ളത്. മദ്യപാനത്തിനും, പരസ്യമായ സ്നേഹപ്രകടനങ്ങള്‍ക്കും, സ്വവര്‍ഗ്ഗാനുരാഗത്തിനുമൊക്കെ കഠിന ശിക്ഷകളാണ് കോടതികള്‍ വിധിക്കുന്നത്. 2005 ലെ സുനാമി തകര്‍ത്ത പ്രദേശമാണ് ആഛേ. മാസങ്ങള്‍ നീണ്ടു നിന്ന തടവ് ശിക്ഷക്കൊടുവിലാണ് ചാട്ടവാറടി ഇവര്‍ക്ക് ലഭിക്കുന്നത്.
