ദില്ലി: എന്‍.കെ. പ്രേമചന്ദ്രന്‍ എംപി ലോക്‌സഭയില്‍ അവതരിപ്പിച്ച ശബരിമല സ്വകാര്യബില്‍ ചര്‍ച്ചയ്‌ക്കെടുക്കില്ല. ചര്‍ച്ചയ്‌ക്കെടുക്കേണ്ട ബില്ലുകള്‍ നറുക്കിട്ടെടുത്തപ്പോള്‍ ശബരിമല ബില്‍ ഉള്‍പ്പെട്ടിട്ടില്ല. പ്രേമചന്ദ്രന്‍ അവതരിപ്പിച്ച നാലു ബില്ലുകളും നറുക്കെടുപ്പില്‍ തള്ളിപ്പോയി.
ഒന്പത് അംഗങ്ങള്‍ അവതരിപ്പിച്ച മുപ്പതു സ്വകാര്യബില്ലുകളില്‍നിന്നു മൂന്നെണ്ണമാണു ചര്‍ച്ചയ്ക്കായി നറുക്കിട്ടെടുത്തത്. ജനാര്‍ദന്‍ സിംഗ് സിഗ്രിവാള്‍, സുനില്‍ കുമാര്‍ സിംഗ്, ശ്രീരംഗ് ബര്‍ണ എന്നിവരുടെ ബില്ലുകളാണു പാര്‍ലമെന്റില്‍ ചര്‍ച്ചയ്ക്കു വരിക. തൊഴിലുറപ്പ്, ഇഎസ്‌ഐ, സര്‍ഫാസി നിയമ ഭേദഗതി ബില്ലുകള്‍ക്കുള്‍പ്പെടെ നറുക്കുവീണില്ല.
ശബരിമല ക്ഷേത്രത്തിലെ ആചാരങ്ങള്‍ 2018 സെപ്റ്റംബര്‍ ഒന്നിനു നിലവിലുണ്ടായിരുന്നതു പോലെ തന്നെ നിലനിര്‍ത്താനുള്ള വ്യവസ്ഥകള്‍ ഉള്‍പ്പെടുത്തിയാണു പ്രേമചന്ദ്രന്‍ ബില്‍ അവതരിപ്പിച്ചത്. ഇനിവരുന്ന നറുക്കെടുപ്പുകളിലും പ്രേമചന്ദ്രന്റെ ബില്‍ ഉള്‍പ്പെടുത്തുമെങ്കിലും ചര്‍ച്ചയ്ക്കു വരാനുള്ള സാധ്യത കുറയും.
