നരിക്കുനി:ഫ്രൂട്സ് സ്റ്റാള് ഉടമ സ്വയം ലോഡിറക്കിയതിന്റെ പേരില് ചുമട്ടു തൊഴിലാളികളുടെ ക്രൂര മർദ്ദനം.
കോഴിക്കോട് നരിക്കുനിയിലാണ് സംഭവം. ഗുരുതരമായി പരിക്കേറ്റ നരിക്കുനി സ്വദേശി സദഖത്തുള്ള കോഴിക്കോട് മെഡിക്കല് കോളേജ് ആശുപത്രിയില് ചികിത്സ തേടി.മർദ്ദനത്തിനുപുറമെ സ്വന്തമായി ലോഡിറക്കിയാല് ഇനിയും ആക്രമിക്കുമെന്ന് തൊഴിലാളികള് ഭീഷണിപ്പെടുത്തിയതായും സദഖത്തുള്ള പറഞ്ഞു.
തൊഴിലാളികള് കടയുടെ സമീപമുള്ളപ്പോള് അവരെ തന്നെയാണ് ചുമടിറക്കാന് ഏല്പ്പിക്കാറുള്ളത്. തിങ്കളാഴ്ച ഉച്ച സമയത്ത് ലോഡുമായെത്തിയപ്പോള് തൊഴിലാളികളെ കാണാത്തതിനാല് സ്വയം ചുമടിറക്കുകയായിരുന്നു. ഇതിനിടയില് സ്ഥലത്തെത്തിയ തൊഴിലാളികളാണ് അക്രമിച്ചതെന്നും സദഖത്തുള്ള പറഞ്ഞു. അതേസമയം തൊഴില് നല്കാത്തതിനെച്ചൊല്ലി യുണ്ടായ തര്ക്കത്തിനിടെ സദഖത്തുള്ള തൊഴിലാളികളെ കൈയേറ്റം ചെയ്യുകയായിരുന്നുവെന്നാണ് തൊഴിലാളി സംഘടനകളുടെ വിശദീകരണം. സംഭവത്തിൽ കേസ് എടുത്തിട്ടുണ്ടെന്നും അന്വേഷണം നടക്കുകയാണെന്നും കൊടുവള്ളി പോലീസ് അറിയിച്ചു.