കൊച്ചി: റെയ്ഡിന് പിന്നാലെ സംസ്ഥാനത്തെ 13 യൂട്യൂബർമാർക്കെതിരെ നടപടിയെടുത്ത് ആദായ നികുതി വകുപ്പ്. നിരവധി വരുമാനമുണ്ടായിട്ടും അതു വെളിപ്പെടുത്താതെയും നികുതി അടയ്ക്കാതെയും പ്രവർത്തിച്ചുവന്ന 13 യു ട്യൂബർമാരുടെ വീടുകളിലും ഓഫീസുകളിലും ആണ് ആദായ നികുതി വകുപ്പ് റെയ്ഡ് നടത്തിയത്. വരുമാനത്തിന്റെയും ബാങ്കിടപാടുകളുടെയും രേഖകൾ ഹാജരാക്കാൻ ആവശ്യപ്പെട്ട് ഇവർക്ക് ആദായനികുതി വകുപ്പ് നോട്ടീസ് നൽകി.
വീഴ്ച വരുത്തിയ നികുതിപ്പണം എത്രയും വേഗം തിരികെ അടയ്ക്കണമെന്ന് ആദായ നികുതി വകുപ്പ് അറിയിച്ചു. എൻ ആർ ബി, അർജു, ജയരാജ് ജി നാഥ്, കാസ്‌ട്രോ, റെയിസ്റ്റർ തുടങ്ങിയവരുടെ വീടുകളിലും ഓഫീസുകളിലുമായിരുന്നു റെയ്ഡ്. ആലപ്പുഴ, പത്തനംതിട്ട, തൃശ്ശൂർ, കാസർകോട്, എറണാകുളം, പാലക്കാട് ജില്ലകളിലായാണ് റെയ്ഡ് നടന്നത്.
