ഹീറോ ഇന്ത്യന്‍ സൂപ്പര്‍ ലീഗില്‍ ഇന്ന് 2 കരുത്തുറ്റ ടീമുകള്‍ തമ്മില്‍ പോരാട്ടം. വൈകിട്ട് 7.30 ന് കിക്കോഫ് ചെയ്യുന്ന മത്സരത്തില്‍ മുബൈ സിറ്റി എഫ്സി എ.ടി.കെ മോഹന്‍ ബഗാനെ നേരിടും. മുബൈയുടെ മൈതാനത്ത് വെച്ചാണ് ഈ മത്സരം . മുന്‍ ചാമ്പ്യന്മാരാണ് ഇരുടീമുകളും. ഇത്തവണയും കരുത്തുറ്റ സ്ക്വാഡുമായാണ് ഇരുടീമുകളുടെയും വരവ്. നിലവില്‍ 4 മത്സരങ്ങളില്‍ നിന്നും 8 പോയിന്റ് നേടിയ മുബൈ ടേബിളില്‍ 4ആം സ്ഥാനത്താണ്.
3 മത്സരങ്ങള്‍ മാത്രം കളിച്ച എ.ടി.കെ 6 പോയിന്റുമായി 6ആം സ്ഥാനത്താണ് ഉള്ളത്. ഇന്ന് മുംബൈ ആണ് വിജയിക്കുന്നതെങ്കില്‍ ഗോവയെ പിന്തള്ളിക്കൊണ്ട് അവര്‍ക്ക് 2ആം സ്ഥാനത്തേക്ക് പ്രവേശിക്കുവാന്‍ സാധിക്കും. അതേസമയം എ.ടി.കെയാണ് വിജയിക്കുന്നതെങ്കില്‍ ഒഡീഷയെ മറികടന്നുകൊണ്ട് അവര്‍ 3ആം സ്ഥാനത്തേക്ക് കയറും. അതുകൊണ്ടുതന്നെ ഇരുടീമുകളും 3 പോയിന്‍്റിന് തന്നെയാകും ലക്ഷ്യം വെക്കുക. ഏറ്റവുമൊടുവില്‍ നടന്ന മത്സരത്തില്‍ വിജയം നേടുവാന്‍ 2 ടീമുകള്‍ക്കും സാധിച്ചിരുന്നു.
