പ്രശസ്ത ചലച്ചിത്ര- നാടക നടന് കൈനകരി തങ്കരാജിന് നാട് അന്ത്യാഞ്ജലി നേർന്നു. സംസ്കാരം രാവിലെ ഒന്പതിന് കേരളപുരത്തെ വീട്ടുവളപ്പില് നടക്കും. ദീര്ഘനാളായി കരള് രോഗത്തെത്തുടര്ന്ന് ചികിത്സയിലായിരുന്നു അദ്ദേഹം. ഇന്നലെ ഉച്ചതിരിഞ്ഞ് കേരളപുരത്തെ സ്വവസതിയിൽ വച്ചായിരുന്നു അന്ത്യം.
കൊല്ലം കേരളപുരം വേലം കോണത്ത് സ്വദേശിയാണ് കൈനകരി തങ്കരാജ്. പ്രശസ്ത നാടക പ്രവര്ത്തകന് കൃഷ്ണന്കുട്ടി ഭാഗവതരുടെ മകനാണിദ്ദേഹം. ഹോം, ഇ മ യൗ , ലൂസിഫര് എന്നി ചിത്രങ്ങളിലാണ് അദ്ദേഹം അവസാനമായി അഭിനയിച്ചത്. അതിലെ കഥാപാത്രങ്ങളെല്ലാം ശ്രദ്ധനേടിയതായിരുന്നു.
പ്രേം നസീര് നായകനായി എത്തിയ ആനപ്പാച്ചന് എന്ന ചിത്രത്തിലൂടെയായിരുന്നു അദ്ദേഹം സിനിമാലോകത്തേയ്ക്ക് എത്തിയത്. ഈ ചിത്രത്തിനുശേഷം അച്ചാരം അമ്മിണി ഓശാരം ഓമന,ഇതാ ഒരു മനുഷ്യന്, തുടങ്ങിയ ചിത്രങ്ങളിലും അഭിനയിച്ചു. അതിനുശേഷം വീണ്ടും കെപിഎസിയുടെ നാടകഗ്രൂപ്പില് ചേര്ന്നു.എന്നാല് ഏറെ നാള് കഴിയുന്നതിനു മുന്പു തന്നെ നാടകപ്രവര്ത്തനം മതിയാക്കി വീണ്ടും സിനിമയില് സജീവമായി.

