തിരുവനന്തപുരം: ബിജെപി സംസ്ഥാന ഭാരവാഹി പട്ടിക ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍ പ്രഖ്യാപിച്ചു. ശോഭാ സുരേന്ദ്രന്‍, എ.എന്‍.രാധാകൃഷ്ണന്‍ എന്നിവരെ വൈസ് പ്രസിഡന്റുമാരായി നിയമിച്ചു.
നിലവില്‍ ഇരുവരും ജനറല്‍ സെക്രട്ടറിമാരായിരുന്നു. എം.ടി.രമേശിന് മുന്‍പ് വഹിച്ചിരുന്ന ജനറല്‍ സെക്രട്ടറി പദവി തന്നെയാണ് നല്‍കിയിരിക്കുന്നത്.
10 വൈസ് പ്രസിഡന്റുമാരും നാല് ജനറല്‍ സെക്രട്ടറിമാരുമാണ് പുതിയ പട്ടികയില്‍ സ്ഥാനം പിടിച്ചത്. എ.പി.അബ്ദുള്ളക്കുട്ടി വൈസ് പ്രസിഡന്റായി തുടരും. ജെ.ആര്‍.പത്മകുമാറാണ് ട്രഷറര്‍. ബി.ഗോപാലകൃഷ്ണന്‍, എം.എസ്.കുമാര്‍, സന്ദീപ് വാര്യര്‍ എന്നിവരെ പാര്‍ട്ടിയുടെ വക്താക്കളായും നിയമിച്ചിട്ടുണ്ട്.
ഭാരവാഹി പട്ടികയിലെ മൂന്നിലൊന്ന് ഭാഗം സ്ത്രീകള്‍ക്കായി മാറ്റിവച്ചുവെന്ന് സംസ്ഥാന അധ്യക്ഷന്‍ പറഞ്ഞു. കെ.എസ്.രാധാകൃഷ്ണന്‍, സദാനന്ദന്‍ മാസ്റ്റര്‍, ജി.രാമന്‍നായര്‍, ജെ.പ്രമീളദേവി, വി.വി.രാജന്‍, വി.ടി.രമ, എം.എസ്.സമ്പൂര്‍ണ എന്നിവരാണ് മറ്റ് വൈസ് പ്രസിഡന്റുമാര്‍, ജോര്‍ജ് കുര്യന്‍, പി.കെ.സുധീര്‍, സി.കൃഷ്ണകുമാര്‍ എന്നിവരാണ് മറ്റ് ജനറല്‍ സെക്രട്ടറിമാര്‍.
