പത്തനംതിട്ട : ജില്ലയില് കോവിഡ്-19 സ്ഥിരീകരിച്ചതിനു പിന്നാലെ പൊതുപരിപാടികള് റദ്ദാക്കി. വനിതാദിന പരിപാടികളടക്കം ജില്ലയിലെ എല്ലാ പൊതുപരിപാടികളും റദ്ദാക്കിയതായി ജില്ലാ കളക്ടര് പിബി നൂഹ് അറിയിച്ചു. മതപരമായ കൂടിച്ചേരലുകളും ഒഴിവാക്കണമെന്ന് ജില്ല കളക്ടര് അഭ്യര്ത്ഥിച്ചു.
അതേ സമയം കൊറോണ വൈറസ് ബാധിച്ച മൂന്നംഗ പ്രവാസി കുടുംബവും ഇവരുടെ ബന്ധുക്കളായ രണ്ട് പേരുമായും ഇടപെട്ടവരെ കണ്ടെത്താനുള്ള ശ്രമങ്ങള് ആരോഗ്യവകുപ്പ് ആരംഭിച്ചു. വെനീസില് നിന്നു ദോഹയിലേക്കും അവിടെ നിന്നും കൊച്ചിയിലേക്കും വിമാനത്തില് സഞ്ചരിച്ച് മാര്ച്ച് ഒന്നിന് കോട്ടയത്ത് എത്തിയ പ്രവാസി കുടുംബം പിന്നീട് കോട്ടയം, കൊല്ലം ജില്ലകളിലും സഞ്ചരിച്ചതായി ആരോഗ്യവകുപ്പ് ഇപ്പോള് കണ്ടെത്തിയിട്ടുണ്ട്. ദോഹ-കൊച്ചി വിമാനത്തില് മാത്രം ഇവര്ക്കൊപ്പം 350-പേരാണ് സഞ്ചരിച്ചത്. ഫെബ്രുവരി 29-ന് വെനീസില് നിന്നും പുറപ്പെട്ട രോഗബാധിതര് മാര്ച്ച് ആറാം തീയതിയാണ് അധികൃതരുടെ നിര്ബന്ധം മൂലം ആശുപത്രിയില് അഡ്മിറ്റായത്. നാട്ടിലുണ്ടായിരുന്ന ദിവസങ്ങളില് ഇവര് എവിടെയെല്ലാം പോയി ആരെയെല്ലാം കണ്ടു എന്ന വിവരങ്ങള് കണ്ടെത്താനായി വിപുലമായ സംവിധാനങ്ങളാണ് ഒരുക്കിയിരിക്കുന്നത്. നാട്ടിലെത്തി പനി ബാധിച്ചതിനെ തുടര്ന്ന് ഇവര് റാന്നിയിലെ ഒരു സ്വകാര്യ ആശുപത്രിയില് എത്തി ചികിത്സ തേടിയിരുന്നു.
ഇറ്റലിയില് നിന്നും വന്ന 56,53 വയസുള്ള ദമ്പതിമാര് ഇവരുടെ 24 വയസുള്ള മകന്. ഇവരുടെ അടുത്ത ബന്ധുവും അയല്വാസികളുമായ 65-കാരനും 61 വയസുള്ള സ്ത്രീയും. ഇങ്ങനെ അഞ്ച് പേര്ക്കാണ് വൈറസ് ബാധ സ്ഥിരീകരിച്ചത്. നിലവില് പത്തനംതിട്ട ജനറല് ആശുപത്രിയിലെ ഐസേെോലഷന് വാര്ഡില് കഴിയുന്ന അഞ്ച് പേരുടേയും ആരോഗ്യനില തൃപ്തികരമാണ്.