എറണാകുളം: കോമ്പാറയില് വന് കഞ്ചാവ് വേട്ട. കാറിന്റെ ഡിക്കിയില് ഒളിപ്പിച്ച് കടത്താൻ ശ്രമിച്ച 80 കിലോയോളം കഞ്ചാവാണ് പോലീസ് പിടിച്ചെടുത്തത്. സംഭവവുമായി ബന്ധപ്പെട്ട് ആലുവ സ്വദേശി കബീര്, എടത്തല സ്വദേശി നജീബ്, വരാപ്പുഴ സ്വദേശികളായ മനു ബാബു, മനീഷ് എന്നിവരാണ് അറസ്റ്റിലായത്.
എറണാകുളം റൂറല് ജില്ലാ പോലീസ് മേധാവി കെ കാര്ത്തികിന്റെ നേതൃത്വത്തിലുള്ള സംഘമാണ് കഞ്ചാവ് പിടികൂടിയത്. കഴിഞ്ഞ ദിവസം കിഴക്കമ്പലം ഊരക്കാട് നിന്ന് രണ്ട് കിലോയോളം കഞ്ചാവ് പിടിച്ചെടുത്തിരുന്നു. ഈ കേസിന്റെ തുടരന്വേഷണമാണ് കോമ്പാറയിലെ വന് കഞ്ചാവ് വേട്ടയിലെത്തിച്ചത്.
നിര്ത്തിയിട്ട കാറിന്റെ ഡിക്കിയില് വിവിധ പാക്കറ്റുകളിലായാണ് കഞ്ചാവ് സൂക്ഷിച്ചിരുന്നത്. കഞ്ചാവ് വാങ്ങാനെത്തിയ രണ്ടുപേരെയും പോലീസ് കസ്റ്റഡിയിലെടുത്തു. പ്രതികളെ ഇന്ന് കോടതിയില് ഹാജരാക്കും.
