ഇടുക്കി: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനു മുന്നോടിയായുള്ള വോട്ടർ പട്ടിക പുതുക്കുന്നതിനുള്ള നടപടികൾ ആരംഭിച്ചു. സംസ്ഥാന തെരഞ്ഞെടുപ്പ് കമ്മീഷൻ നേരിട്ട് നടത്തുന്ന തെരഞ്ഞെടുപ്പായതിനാൽ പ്രത്യേകം വോട്ടർ പട്ടികയാണ് തെരഞ്ഞെടുപ്പിൽ പരിഗണിക്കുക. ജൂൺ ആറിന് കരട് വോട്ടർ പട്ടികയും ജൂലൈ ഒന്നിന് അന്തിമ വോട്ടർ പട്ടികയും പ്രസിദ്ധീകരിക്കും.
2024 ജനുവരി ഒന്നിന് 18 വയസ് പൂർത്തിയായ മുഴുവൻ പേരും വോട്ടർ പട്ടികയിൽ ഉൾപ്പെട്ടിട്ടുണ്ടെന്ന് ഉറപ്പ് വരുത്തണം. അവകാശവാദ അപേക്ഷകളും പരാതികളും ജൂൺ ആറ് മുതൽ 21 വരെ സ്വീകരിക്കുന്നതായിരിക്കും. ദേശീയ തെരഞ്ഞെടുപ്പ് കമ്മീഷൻ്റെ വോട്ടർ പട്ടികയും തദ്ദേശ സ്വയംഭരണ സ്ഥാപനങ്ങളിലേക്കുള്ള വോട്ടർ പട്ടികയും രണ്ടാണെന്ന കാര്യം രാഷ്ട്രീയ പാർട്ടി പ്രതിനിധികളും പൊതുജനങ്ങളും തിരിച്ചറിയണമെന്ന് ഇലക്ടറൽ രജിസ്ട്രേഷൻ ഓഫീസർ മാർക്കുള്ള പരിശീലന പരിപാടിയിൽ അദ്ധ്യക്ഷത വഹിച്ച ജില്ലാ കലക്ടർ ഷീബാ ജോർജ് പറഞ്ഞു.
കരട് പട്ടികയിൽ ഉൾപ്പെട്ട മരണപ്പെട്ടവർ, താമസം മാറിയവർ എന്നിവരുടെ പേരു വിവരങ്ങൾ ഇലക്ടറൽ രജിസ്ട്രേഷൻ ഓഫീസർമാർ പ്രത്യേക പട്ടികയാക്കി ജൂൺ 10-നുള്ളിൽ നോട്ടീസ് ബോർഡിൽ പ്രസിദ്ധപ്പെടുത്തണം. ഏഴ് ദിവസത്തിനകം പരാതി ലഭിക്കാത്ത പക്ഷം സ്വമേധയാ അവരുടെ പേര് പട്ടികയിൽ നിന്ന് ഒഴിവാക്കുന്നതായിരിക്കും. ഓരോ ദിവസവും ലഭിക്കുന്ന അപേക്ഷകളും പരാതികളും ഓഫീസിലെ നോട്ടീസ് ബോർഡിൽ ഇലക്ടറൽ രജിസ്ട്രേഷൻ ഓഫീസർമാർ പ്രദർശിപ്പിക്കുന്നതായിരിക്കും.
