തടി കുറയ്ക്കാൻ വെറുതെ പട്ടിണി കിടന്നിട്ടോ, ഡയറ്റ് നോക്കിട്ടോ മാത്രം കാര്യമില്ല. ഏതെല്ലാം ആഹാരങ്ങള്‍ എപ്പോള്‍ കഴിച്ചാലാണ് നല്ല ഫലം ലഭിക്കുക എന്ന് അറിഞ്ഞിരിക്കണം. ചിലര്‍ക്ക് തടി കുറയ്ക്കണ്ട വയര്‍ മാത്രം ഒന്ന് കുറഞ്ഞ് കിട്ടിയാല്‍ മതി എന്നാഗ്രഹിക്കുന്നവരും കുറവല്ല. നമ്മളുടെ തടി കുറയുന്നതിന് അനുസരിച്ച് വയറും വേഗത്തില്‍ കുറയുന്നതാണ്. ഇത്തരത്തില്‍ ശരീരഭാരം വേഗത്തില്‍ കുറച്ചെടുക്കാന്‍ നിങ്ങള്‍ രാവിലെ തന്നെ കഴിക്കേണ്ട ചില ആഹാരങ്ങള്‍ ഉണ്ട്. അവ ഏതെല്ലാമെന്ന് നോക്കാം.
മുട്ട
തടി കൂട്ടാന്‍ വേണ്ടിയാണ് മുട്ട കഴിക്കേണ്ടത് എന്ന് ചിന്തിക്കുന്ന നിരവധി ആളുകളുണ്ട്. എന്നാല്‍, ശരീരഭാരവും മസിലും പുഷ്ടിപ്പെടുത്താന്‍ മാത്രമല്ല, വണ്ണം കുറയ്ക്കാന്‍ ശ്രമിക്കുന്നവരും മുട്ട കഴിക്കുന്നത് ശീലമാക്കേണ്ടത് അനിവാര്യമാണ്. നമ്മള്‍ രാവിലെ തന്നെ മുട്ട കഴിക്കുമ്പോള്‍ ശരീരത്തിലേയ്ക്ക് പ്രോട്ടീന്‍ എത്തുന്നു. ഇത് വിശപ്പ് കുറയ്ക്കുന്നതിനും അമിതമായി ആഹാരം കഴിക്കാനുള്ള പ്രവണത കുറയക്കാനും ഇത് സഹായിക്കുന്നുണ്ട്. ഇത്തരത്തില്‍ എന്നും അടുപ്പിച്ച് കഴിക്കുന്നവരില്‍ കുറഞ്ഞത് 65 ശതമാനത്തോളം തടി കുറയ്ക്കാന്‍ സഹായിക്കുന്നുണ്ട്.
മുട്ട കഴിക്കുന്നതിനാല്‍ തന്നെ ഒമേഗ-3 ശരീരത്തില്‍ എത്തുന്നതിനും അതുപോലെ, പ്രോട്ടീന്‍ എത്തുന്നതിനും ഇത് സഹായിക്കുന്നു.
സ്മൂത്തീസ്
രാവിലെ പ്രഭാത ഭക്ഷണമായി കഴിക്കാന്‍ സാധിക്കുന്ന ഒരു ആഹാരമാണ് സ്മൂത്തീസ്. ഇത് പല സാധനങ്ങള്‍ ഉപയോഗിച്ച് നമുക്ക് തയ്യാറാക്കാവുന്നതാണ്. ചിലര്‍ ഓട്‌സ് ചേര്‍ത്ത് സ്മൂത്തി തയ്യാറാക്കും. ചിലര്‍ ഇതില്‍ പലതരം വിത്തുകളും ചേര്‍ക്കുന്നത് കാണാം. ഇത്തരത്തില്‍ നിങ്ങള്‍ക്ക് തടി കുറയ്ക്കുന്നതിന്റെ ഭാഗമായി തയ്യാറആക്കാന്‍സാധിക്കുന്ന ഒരു സ്മൂത്തിയുടെ റെസീപ്പി നോക്കാം. ഇത് തയ്യാറാക്കുന്നതിനായി 2 ടീസ്പൂണ്‍ ഓട്‌സ് എടുക്കുക. ഇതിലേയ്ക്ക് ഒരു ചെറുപഴം എടുക്കണം. അതുപോലെ, തലേദിവസം കുതിര്‍ത്ത മൂന്ന് ബദാം, മൂന്ന് ഉണക്കമുന്തിരി, മൂന്ന് ഈന്തപ്പഴം എന്നിവ എടുക്കുക.
ഇതെല്ലാം കൊഴുപ്പ് കുറഞ്ഞ പാലും ചേര്‍ത്ത് അരച്ച് എടുക്കണം. ഇതിലേയ്ക്ക് കുതിര്‍ത്ത ചിയ സീഡ്‌സ് ചേര്‍ക്കുന്നതും നല്ലതാണ്. ഇത്തരത്തില്‍ തയ്യാറാക്കി എടുക്കുന്ന സ്മൂത്തി ദിവസേന കുടിക്കുന്നത് ശരീരത്തിന് നല്ല എനര്‍ജി ലഭിക്കുന്നതിനും ഫൈബര്‍ എത്തുന്നതിനും കൊഴുപ്പ് ഇല്ലാതാക്കുന്നതിനും സഹായിക്കുന്നു.
ഗ്രീന്‍ ടീ
ശരീരഭാരം കുറയ്ക്കാന്‍ ശ്രമിക്കുന്ന പലരും ഗ്രീന്‍ ടീ കുടിക്കുന്നവരായിരിക്കും. ഇത് കുടിച്ച് ശീവമാക്കുന്നവരില്‍ നിരവധി ഗുണങ്ങളാണ് കാണാന്‍ സാധിക്കുക. ഇവരില്‍ കൊഴുപ്പ് അടിഞ്ഞ് കൂടാതിരിക്കുകയും, ഇത് വേഗത്തില്‍ തടി കുറയ്ക്കാന്‍ സഹായിക്കുകയും ചെയ്യുന്നു.
ഗ്രീന്‍ ടീയില്‍ കറുവാപ്പട്ട, നാരങ്ങ എന്നിവയെല്ലാം ചേര്‍ത്ത് തയ്യാറാക്കുന്ന ചായ കൂടുതല്‍ ഫലപ്രദമാണ്. ഇത് തയ്യാറാക്കുന്നതിനായി ഒരു വലിയ കഷ്ണം കറുവാപ്പട്ട എടുക്കുക. ഇതിലേയ്ക്ക് ഒരു നാരങ്ങയുടെ പകുതി മുറിച്ച് നീര് എടുത്ത് മാറ്റി വെക്കുക.
ഒന്നര ഗ്ലാസ്സ് വെള്ളം എടുത്ത് ഇതിലേയ്ക്ക് കറുവാപ്പട്ട ചേര്‍ക്കുക. വെള്ളം നന്നായി തിളച്ച് വരുമ്പോള്‍ ഇതിലേയ്ക്ക് ഗ്രീന്‍ ടീ ഇല ചേര്‍ത്ത് തിളപ്പിച്ച് മാറ്റി അരിച്ച് വെക്കണം. ഇതിലേയ്ക്ക് നാരങ്ങ നീരും ചേര്‍ത്ത് കുടിക്കാവുന്നതാണ്. കുറച്ച് മധുരം വേണം എന്നുള്ളവര്‍ക്ക് ചൂട് കുറഞ്ഞതിന് ശേഷം ഇതിലേയ്ക്ക് തേന്‍ ചേര്‍ക്കാവുന്നതാണ്.
ചിയ സീഡ്‌സ്
ചിയ സീഡ്‌സ് സ്മൂത്തിയിലും അതുപോലെ, നിങ്ങള്‍ കുടിക്കാന്‍ എടുക്കുന്ന വെള്ളത്തിലും ചേര്‍ക്കുന്നത് ശരീരം തണുപ്പിക്കുന്നതിനോടൊപ്പം തന്നെ ശരീരഭാരം കുറയ്ക്കാനും ഇത് സഹായിക്കുന്നുണ്ട്.
ചിയ സീഡ്‌സില്‍ പ്രോട്ടീന്‍ അടങ്ങിയിട്ടുണ്ട്. അതുപോലെ, ഫൈബര്‍ അടങ്ങിയിട്ടുണ്ട്. ഇത് വയര്‍ നിറഞ്ഞ അനുഭൂതി നല്‍കുന്നതിനും ഇടയ്ക്കിടയ്ക്ക് ആഹാരം കഴിക്കാനുള്ള ത്വര കുറയ്ക്കാനും സഹായിക്കുന്നു. അതിനാല്‍ എന്നും ചിയ സീഡ്‌സ് കുതിര്‍ത്ത് വെക്കുക. ഇത് നിങ്ങളുടെ ആഹാരത്തില്‍ ചേര്‍ത്ത് കഴിക്കാവുന്നതാണ്.
