ഇൻഡോർ : നിക്ഷേപകർക്ക് അനുകൂലമായ ഏറ്റവും മികച്ച സാധ്യതകളാണ് ഇപ്പോൾ സംസ്ഥാനത്തിൽ ഒരുക്കിയിരിക്കുന്നതെന്ന് മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാൻ . ഇൻഡോറിൽ നടക്കുന്ന പ്രവാസി ഭാരതീയ ദിവസിനോടനുബന്ധിച്ച് ലുലു ഗ്രൂപ്പ് ചെയർമാൻ എം.എ.യൂസഫലിയുമായുള്ള കൂടിക്കാഴ്ചക്കിടെയായിരുന്നു അദ്ദേഹത്തിന്റെ പ്രസ്താവന.
മധ്യപ്രദേശിലെ ഭക്ഷ്യ സംസ്കരണ, ലൊജിസ്റ്റിക്സ്, റീട്ടെയിൽ മേഖലകളിൽ നിക്ഷേപം നടത്താൻ യൂസഫലിയെ അദ്ദേഹം ക്ഷണിച്ചു. സർക്കാരിന്റെ എല്ലാവിധ സഹകരണവും ഇക്കാര്യത്തിൽ ഉണ്ടാകുമെന്ന് മുഖ്യമന്ത്രി ഉറപ്പു നൽകി. മധ്യപ്രദേശിൽ നിക്ഷേപം നടത്തുന്നതിൽ കൂടുതൽ ചർച്ചകൾ സർക്കാരുമായി ഉടൻ തന്നെ നടത്തുമെന്ന് യൂസഫലി പ്രതികരിച്ചു.
സംസ്ഥാന വ്യവസായ വകുപ്പ് ഉദ്യോഗസ്ഥർക്കു പുറമേ ലുലു ഗ്രൂപ്പ് ഇന്ത്യ ഡയറക്ടർ എ.വി.ആനന്ദ് റാം, സിഒഒ രജിത്ത് രാധാകൃഷ്ണൻ എന്നിവരും യോഗത്തിൽ സംബന്ധിച്ചു.
