കൊല്ലം: കുത്തിവയ്പ്പ് എടുത്തതിനെത്തുടർന്ന് അസ്വസ്ഥതകൾ പ്രകടിപ്പിച്ച് രോഗികൾ. പുനലൂര്‍ താലൂക്ക് ആശുപത്രിയ്‌ക്കെതിരെ പരാതി. എട്ട് രോഗികളെ ഐസിയുവിലേക്കും മൂന്ന് കുട്ടികളെ തിരുവനന്തപുരം മെഡിക്കൽ കോളേജിലേക്കും മാറ്റി. പുനലൂർ താലൂക്ക് ആശുപത്രിയിൽ കിടത്തി ചികിത്സയ്‌ക്ക് വിധേയരാക്കിയിരുന്നവരായിരുന്നു പതിനൊന്നു പേരും.
പേ വാർഡിലായിരുന്നു പതിനൊന്ന് പേരും കിടന്നിരുന്നത്. എട്ടരയോടെ ആയിരുന്നു ഇഞ്ചക്ഷൻ എടുത്തത്. ഒരു മണിക്കൂർ കഴിഞ്ഞപ്പോഴാണ് രോഗികൾക്ക് വിറയലും ശരീരത്തിൽ തളർച്ചയും അനുഭവപ്പെട്ട് തുടങ്ങിയത്. അസ്വസ്ഥത പ്രകടിപ്പിച്ച ഉടൻ തന്നെ ഇവരെ ഐസിയുവിലേക്ക് മാറ്റി. പിന്നീട് മൂന്ന് കുട്ടികളെ തിരുവനന്തപുരം മെഡിക്കൽ കോളേജിലേക്ക് മാറ്റുകയായിരുന്നു. നിലവിൽ ആരോഗ്യ നിലയിൽ പ്രശ്നങ്ങളില്ല എന്നാണ് ഡോക്ടർമാർ അറിയിച്ചത്. ഇതിന് പിന്നിലെ കാരണം ഇതുവരെയും വ്യക്തമാക്കിയില്ല.
