കോട്ടയം: കോട്ടയത്ത് ലഹരി വേട്ട.കോട്ടയം പാലായിൽ ഹാഷീഷ് ഓയിലും കഞ്ചാവുമായി യുവാവ് പിടിയിൽ. മുണ്ടക്കയം കൂട്ടിക്കൽ സ്വദേശി കടവുകരയിൽ വീട്ടിൽ 26കാരനായ താരിഖ് തൗഫീഖ് ആണ് അറസ്റ്റിലായത്.
കെ.കെ റോഡിൽ പാലാ എക്സൈസ് നടത്തിയ ഹൈവേ പട്രോളിങ്ങിനിടയിലാണ് ലഹരിവസ്തുക്കൾ പിടിച്ചെടുത്തത്.
നിർത്താതെ പാഞ്ഞ കാർ പിന്തുടർന്ന് 19-ാം മൈലിൽ പിടികൂടി പരിശോധിച്ചപ്പോഴാണ് കാറിനുള്ളിൽ നിന്ന് 18 ഗ്രാം ഹാഷീഷ് ഓയിലും 13 ഗ്രാം കഞ്ചാവും എക്സൈസ് സംഘം പിടികൂടിയത്.
താരിഖ് തന്റെ സുഹൃത്തിന്റെ ഹ്യുണ്ടായ് ഇയോൺ കാറിൽ കൂട്ടിക്കലിൽ നിന്ന് എറണാകുളത്തെ വീട്ടിലേക്ക് പോകുമ്പോൾ നിയന്ത്രണമില്ലാതെ കാർ ഓടിച്ചത് ശ്രദ്ധയിൽപെട്ടതിനെത്തുടർന്ന് എക്സൈസ് പട്രോളിങ് സംഘം ആവശ്യപ്പെട്ടെങ്കിലും നിർത്തിയില്ല.
പിന്നീട് വാഹനത്തെ പിന്തുടർന്ന് പിടികൂടുകയായിരുന്നു. പിടികൂടിയപ്പോൾ ഇയാൾ മയക്കുമരുന്ന് ലഹരിയിലായിരുന്നു എന്ന് എക്സൈസ് സംഘം പറയുന്നു.
വിവിധ രാജ്യങ്ങളിൽ സന്ദർശനം നടത്തിയിരുന്ന ഇയാൾ കഴിഞ്ഞ ആഗസ്റ്റിലാണ് കേരളത്തിലെത്തിയത്. ലഹരിവസ്തുക്കളോടൊപ്പം ശരീരം പുഷ്ടിക്കുന്നതിന് ഉപയോഗിക്കുന്ന പ്രോട്ടീൻ പൗഡർ കാറിൽ സൂക്ഷിച്ചിരുന്നു. കാറും കസ്റ്റഡിയിലെടുത്തിട്ടുണ്ട്.
താരിഖ് ഇറ്റലിയിൽ മൂന്നുവർഷം എം.ബി.ബി.എസിന് പഠിച്ചെങ്കിലും പഠനം പൂർത്തിയാക്കിയിട്ടില്ല.
പരിശോധനയിൽ പാലാ എക്സൈസ് സർക്കിൾ ഇൻസ്പെക്ടർ രാജേഷ് ജോൺ, പ്രിവന്റിവ് ഓഫിസർ കെ.വി. ബാബു, സിവിൽ ഓഫിസർമാരായ നിഫി ജേക്കബ്, ഡി. അമൽദേവ്, ഡ്രൈവർ ബിബിൻ ജോയ് എന്നിവർ പങ്കെടുത്തു.പ്രതിയെ ചങ്ങനാശ്ശേരി കോടതിയിൽ ഹാജരാക്കി.
തിരുവാഭരണ ഘോഷയാത്ര മൂന്നാം ദിന കാഴ്ചകൾ | LIVE | Day 3
