മംഗലൂരു: നരേന്ദ്ര മോദി വീണ്ടും പ്രധാനമന്ത്രിയാകാന്‍ ആഗ്രഹിച്ച പ്രവാസിയായ സുധീന്ദ്ര ഹെബ്ബാറാണ് ഓസ്ട്രേലിയയിലെ ജോലി രാജിവച്ച് വോട്ട് ചെയ്യാന്‍ വേണ്ടി ഇന്ത്യയിലേക്ക് മടങ്ങിയെത്തിയത്.
സുധീന്ദ്ര ഹെബ്ബാര്‍ തന്‍റെ സിഡ്‍നി വിമാനത്താവളത്തിലെ സ്ക്രീനിങ് ഓഫീസര്‍ ജോലി രാജിവച്ചാണ് മടങ്ങിയെത്തിയത്.മോദി ഒരിക്കല്‍ക്കൂടി പ്രധാനമന്ത്രിയാകുമെന്ന് ഉറപ്പാക്കാന്‍ താന്‍ വോട്ടുചെയ്യുമെന്നാണ് ഇയാള്‍ പറയുന്നത്. ഇന്നലെ മംഗലൂരുവില്‍ നരേന്ദ്ര മോദിയുടെ റാലിയിലും ഹെബ്ബാര്‍ പങ്കെടുത്തിരുന്നു.
ഏപ്രില്‍ അഞ്ച് മുതല്‍ 12 വരെയായിരുന്നു ഹെബ്ബാറിന് അവധി ലഭിച്ചത്.എന്നാല്‍ വോട്ട് ചെയ്യണമെങ്കില്‍ അവധി നീട്ടിക്കിട്ടണം. ഈസ്റ്റര്‍, റംസാന്‍ അവധി കാരണം എയര്‍പോര്‍ട്ടില്‍ വലിയ തിരക്കാണ് എന്നതുകാരണം അവധി നീട്ടാനാകില്ലെന്ന് അധികൃതര്‍ അറിയിച്ചു. ഇതോടെയാണ് ഇയാള്‍ ജോലി രാജിവക്കാന്‍ തീരുമാനിച്ചത്.
സിഡ്‍നിയില്‍ എല്ലാവരും ഇന്ത്യയെ പുകഴ്‍ത്തുകയാണെന്നും ഇതിന് കാരണം നരേന്ദ്ര മോദിയാണെന്നും സുധീന്ദ്ര വിശ്വസിക്കുന്നു. അതിര്‍ത്തിയില്‍ പോകാന്‍ കഴിഞ്ഞില്ലെന്നും അതിന് പകരം ജനാധിപത്യ അവകാശം വിനിയോഗിക്കുകയാണ് താന്‍ ചെയ്യുന്നതെന്നും ഇയാള്‍ പറയുന്നു.
