മോഹൻലാലിനെ കേന്ദ്ര കഥാപാത്രമാക്കി പ്രിയദർശൻ സംവിധാനം ചെയ്ത മരക്കാർ അറബിക്കടലിന്റെ സിംഹത്തിലെ ഇളവെയിൽ എന്ന് തുടങ്ങുന്ന ഗാനത്തിന്റെ വീഡിയോ പുറത്തിറങ്ങി.
പ്രഭാവർമ്മയുടെ വരികൾക്ക് റോണി റാഫേൽ സംഗീതം പകർന്നിരിക്കുന്ന ഗാനം ആലപിച്ചിരിക്കുന്നത് എം.ജി ശ്രീകുമാറും ശ്രേയ ഘോഷാലും ചേർന്നാണ്. മോഹൻലാലിന്റെ കിടിലൻ നൃത്തച്ചുവടുകളാണ് ഗാനത്തിന്റെ ഹൈലൈറ്റ്.
കൂടാതെ ആർച്ചയായി തിളങ്ങിയ കീർത്തി സുരേഷിന്റെയും ചിന്നാലിയായി എത്തി മികച്ച പ്രകടനം കാഴ്ചവെച്ച് മലയാളികളുടെ മനംകവർന്ന തായ് നടനും സംവിധായകനുമായ ജയ് ജെ ജക്കിർറ്റിന്റെയും തമ്മിലുള്ള പ്രണയ രംഗങ്ങളും ഈ ഗാനത്തിനെ മനോഹരമാക്കി.
ഡിസംബർ 2നാണ് ചിത്രം തീയേറ്ററുകളിൽ പ്രദർശനത്തിനെത്തിയത്. മോഹൻലാൽ- പ്രിയദർശൻ കൂട്ടുകെട്ടിലിറങ്ങിയ ഈ ചിത്രത്തിൽ പ്രണവ് മോഹൻലാൽ, അർജുൻ, സുനിൽ ഷെട്ടി, പ്രഭു,അശോക് സെൽവൻ, ജയ് ജെ ജക്കിർറ്റ്, മഞ്ജു വാര്യർ, സുഹാസിനി, കീർത്തി സുരേഷ്, കല്യാണി പ്രിയദർശൻ, ഫാസിൽ, സിദ്ദിഖ്, നെടുമുടി വേണു, ഇന്നസെൻറ് തുടങ്ങിയ വലിയ താരനിര തന്നെ അണിനിരക്കുന്നുണ്ട്.
മലയാള സിനിമാലോകത്തെ എക്കാലത്തെയും ഉയർന്ന ബജറ്റ് ചിത്രമായ മരക്കാറിന്റെ മുടക്കുമുതൽ 100 കോടിയാണ്.
ആറ് ദേശീയ പുരസ്കാരങ്ങൾ കരസ്ഥമാക്കിയ ചിത്രം ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമാണം. റിലീസിന് മുമ്പേ ചിത്രം നൂറ് കോടി ക്ലബ്ബിൽ ഇടം പിടിച്ചിരുന്നു.
