കോഴിക്കോട്: കോഴിക്കോട് മെഡിക്കല് കോളേജ് ആശുപത്രിയിൽ തട്ടിപ്പ്. മൂന്ന് വർഷത്തിന് മുമ്പ് വൈറോളജി ലാബിലേക്ക് വാങ്ങിയ ഉപകരങ്ങളില് ലക്ഷങ്ങളുടെ വെട്ടിപ്പ് നടന്നെന്ന് കാട്ടി വിജിലന്സിന് നല്കിയ പരാതിയില് തുടരന്വേഷണത്തിന് സർക്കാർ ഇതുവരെ അനുമതി നൽകിയിട്ടില്ല. മെഡിക്കല് കോളേജ് ആശുപത്രിയിലെ ഉദ്യോഗസ്ഥർ വ്യാജ ഉപകരണങ്ങളടക്കം വാങ്ങി ക്രമക്കേട് നടത്തിയെന്നും അതിന്റെ തെളിവുകൾ സഹിതം കോഴിക്കോട് വിജിലന്സിന് പരാതി നല്കുകയും ചെയ്തിരുന്നു.
അതേസമയം സംസ്ഥാന സർക്കാരിന്റെ ഭാഗത്ത് നിന്ന് ഒരു നടപടിയും സ്വീകരിക്കാത്ത സാഹചര്യത്തിൽ കോടതിയെയും കേന്ദ്ര ഏജന്സികളെയും സമീപിക്കാനൊരുങ്ങുകയാണ് പരാതിക്കാർ. 2019 ലാണ് കോഴിക്കോട് മെഡിക്കല് കോളേജ് ആശുപത്രിയിലെ വൈറസ് റിസർച്ച് ആന്ഡ് ഡയഗ്നോസ്റ്റിക് ലബോറട്ടറിയിലേക്കായി വിവിധ ഉപകരണങ്ങൾ വാങ്ങിയതില് ഗുരുതര ക്രമക്കേടുകളുണ്ടെന്ന പരാതി കോഴിക്കോട് വിജലന്സ് സംഘത്തിന് ലഭിക്കുന്നത്. ആശുപത്രിയിൽ തന്നെയുള്ള ഉദ്യോഗസ്ഥരായിരുന്നു രഹസ്യമായി പരാതി നല്കിയത്.
ആർഎഎസ് ലൈഫ് സയന്സ് പ്രൈവറ്റ് ലിമിറ്റഡില് നിന്നാണ് കിറ്റുകൾ വാങ്ങിയത്. എന്നാല് കമ്പനി അധികൃതർ 3 തരം കിറ്റുകൾ തങ്ങൾ നിർമ്മിച്ചതോ വിതരണം ചെയ്തതോ അല്ലെന്ന് അറിയിച്ചു. ഈ കിറ്റുകൾ ആര് നിർമ്മിച്ചതെന്ന് ഇപ്പോഴും വ്യക്തമല്ല. സർക്കാർ ഇതിനെതിരെ ഒരു നടപടിയും ഇതുവരെ കൈക്കൊണ്ടിട്ടില്ല.
