2022 ഫിഫ ലോകകപ്പ് യോഗ്യതാ മത്സരങ്ങള്‍ക്കുള്ള അര്‍ജന്‍റീന സ്ക്വാഡിനെ പ്രഖ്യാപിച്ചു. ഇക്വഡോര്‍, ബൊളീവിയ എന്നീ ടീമുകള്‍ക്കെതിരെ നടക്കുന്ന യോഗ്യതാ മത്സരങ്ങള്‍ക്കുള്ള ടീമിനെയാണ് പ്രഖ്യാപിച്ചിരിക്കുന്നത്. ഇക്വഡോറിനെതിരെ മാര്‍ച്ച് 26നും ബൊളീവിയയ്ക്ക് എതിരെ ഏപ്രില്‍ ഒന്നിനുമാണ് അര്‍ജന്‍റീന യോഗ്യതാ റൗണ്ടില്‍ ഏറ്റുമുട്ടുക.
സൂപ്പര്‍ താരം ലയണല്‍ മെസി യോഗ്യതാ മത്സരങ്ങള്‍ക്കുള്ള ടീമില്‍ തിരിച്ചെത്തി എന്നതാണ് ആരാധകരെ ആവേശത്തിലാക്കുന്ന കാര്യം. ലയണല്‍ മെസിക്കൊപ്പം സെര്‍ജിയോ അഗ്യൂറോ, പൗലോ ഡിബാല, ലൗട്ടറോ മാര്‍ട്ടിനസ് എന്നിവരാണ് മുന്നേറ്റ നിരയില്‍ ഉള്ളത്. എന്നാല്‍ സസ്പെന്‍ഷന്‍ നിലനില്‍ക്കുന്നതിനാല്‍ താരത്തിന് ഇക്വഡോറിന് എതിരായ മത്സരത്തിൽ കളത്തിലിറങ്ങാന്‍ സാധിക്കില്ല. ഒരു മത്സരത്തില്‍ കൂടി വിലക്കുള്ളതിനാല്‍ ഇക്വഡോര്‍ കഴിഞ്ഞുള്ള ബൊളീവിയയ്ക്ക് എതിരായ മത്സരത്തില്‍ മെസിയെ അര്‍ജന്‍റീനന്‍ കുപ്പായത്തില്‍ കാണാനാകും.
ഇറ്റലിയില്‍ കൊറോണ ഭീതി നിലനില്‍ക്കുന്നതിനാല്‍ സീരി എയില്‍ കളിക്കുന്ന താരങ്ങളെ ടീമില്‍ ഉള്‍പ്പെടുത്തില്ലെന്ന തരത്തില്‍ നേരത്തേ വാര്‍ത്തകള്‍ പുറത്ത് വന്നിരുന്നു. എന്നാല്‍ ഇറ്റാലിയന്‍ ലീഗില്‍ കളിക്കുന്ന അഞ്ച് താരങ്ങളെ ടീമിനൊപ്പം ഉള്‍പ്പെടുത്തിയിട്ടുണ്ട്. നിലവില്‍ യുവാന്‍ മുസൊ മാത്രമാണ് ഗോള്‍കീപ്പറായി ഉള്ളത്. എന്നാല്‍ രണ്ട് ഗോള്‍കീപ്പര്‍മാരെ കൂടി ടീമിനൊപ്പം ചേര്‍ക്കുമെന്നാണ് പരിശീലകന്‍ പറയുന്നത്.
