കോഴിക്കോട്: ഖത്തറില്നിന്നു നാട്ടിലേക്ക് മടങ്ങിയ ശേഷം കാണാതായ വളയം സ്വദേശി റിജേഷ് (35) ഒന്നരമാസത്തിന് ശേഷം തിരിച്ചെത്തി. നാദാപുരം മജിസ്ട്രേറ്റ് കോടതിയില് ഹാജരായ റിജേഷ്, സ്വന്തം ഇഷ്ടപ്രകാരം ബെംഗളൂരുവില് പോയതാണെന്ന് അറിയിച്ചു. റിജേഷിനെ സ്വര്ണക്കടത്തുകാര് തട്ടിക്കൊണ്ടുപോയതാണെന്ന് ആണ് പരാതി ഉയര്ന്നത്.
കഴിഞ്ഞ ഒന്നരമാസമായി റിജേഷിനെ പറ്റി ഒരു വിവരവുമില്ലെന്ന് ചൂണ്ടിക്കാട്ടി സഹോദരന് രാജേഷ് വളയം പോലീസില് പരാതി നല്കിയിരുന്നു. വീട്ടിലേക്ക് ഭീഷണി ഫോണ്കോളുകള് വരുന്നുണ്ടെന്നും പലരും അന്വേഷിച്ച് വരുന്നെന്നും സഹോദരന്റെ പരാതിയില് ഉണ്ടായിരുന്നു. സഹോദരന് രാജേഷിന്റെ പരാതിയില് വളയം പോലീസ് കേസെടുത്ത് അന്വേഷണം ആരംഭിച്ചിരുന്നു.
റിജേഷ് ഖത്തറില് ജോലിക്കായി പോയത് മൂന്നുവര്ഷംമുമ്പാണ്. കഴിഞ്ഞ ജൂണ് പത്തിന് ഇയാള് ബന്ധുക്കളുമായി ഫോണില് സംസാരിച്ചിരുന്നു. ജൂണ് 16-ന് കണ്ണൂര് വിമാനത്താവളംവഴി നാട്ടില് എത്തുമെന്നും അറിയിച്ചു. പിന്നീട് ഒരു വിവരവും ലഭിച്ചില്ല. ചിലര് റിജേഷിനെ അന്വേഷിച്ച് വീട്ടുപരിസരത്തെത്താന് തുടങ്ങിയതോടെയാണ് ബന്ധുക്കള് പോലീസില് പരാതി നല്കിയത്.
