ലണ്ടൻ: മങ്കിപോക്‌സ് വൈറസ് സ്ഥിരീകരിച്ചു. യു.കെയിലാണ് കുരങ്ങില്‍ നിന്ന് മനുഷ്യരിലേക്ക് പകരുന്ന ഈ വൈറസ് സ്ഥിരീകരിച്ചതായി റിപ്പോര്‍ട്ട് വന്നിരിക്കുന്നത്. നേരത്തെ നൈജീരിയയിലേയ്ക്ക് പോയ ഇംഗ്ലണ്ടിലെ ഒരാള്‍ക്കാണ് മങ്കിപോക്‌സ് വൈറസ് ബാധിച്ചതെന്ന് യു.കെ ഹെല്‍ത്ത് സെക്യൂരിറ്റി ഏജന്‍സി വ്യക്തമാക്കി.
അതേസമയം, മങ്കിപോക്‌സ് വൈറസ് സാധാരണയായി നേരിയ ലക്ഷണങ്ങള്‍ പ്രകടിപ്പിക്കുന്ന ഒന്നാണ്. ചിക്കന്‍പോക്സുമായി സാമ്യമുള്ള, ആളുകള്‍ക്കിടയില്‍ എളുപ്പത്തില്‍ പടരാത്ത ഒരു അപൂര്‍വ വൈറല്‍ അണുബാധയാണ് മങ്കിപോക്‌സ്. എന്നാൽ അസുഖം വന്ന് കഴിഞ്ഞാല്‍, മിക്ക ആളുകളും ഏതാനും ആഴ്ചകള്‍ക്കുള്ളില്‍ സുഖം പ്രാപിക്കും. എങ്കിലും ചില സന്ദര്‍ഭങ്ങളില്‍ രോഗം ഗുരുതരമാകാമെന്നും യു.കെ ഹെല്‍ത്ത് സെക്യൂരിറ്റി മുന്നറിയിപ്പ് തരുന്നു.
2018ലാണ് യു.കെയില്‍ ആദ്യമായി മങ്കിപോക്‌സ് വൈറസ് റിപ്പോര്‍ട്ട് ചെയ്യപ്പെട്ടത്. തുടർന്ന് വിരലിലെണ്ണാവുന്ന കേസുകള്‍ മാത്രമേ സ്ഥിരീകരിച്ചിട്ടുള്ളൂവെന്ന് ബിബിസി റിപ്പോര്‍ട്ട് ചെയ്തു. പനി, പേശി വേദന, തലവേദന, വിറയല്‍, ക്ഷീണം എന്നിവയാണ് ഈ രോഗത്തിന്റെ പ്രധാന ലക്ഷണങ്ങള്‍.
