തൃശൂര്‍: വീട്ടിലെത്തി വീട്ടുകാരനെ കത്തി ഉപയോഗിച്ച്‌ ആക്രമിച്ച കേസില്‍ രണ്ടുപേര്‍ പിടിയില്‍. വടൂക്കര അയ്യപ്പന്‍കാവില്‍ ഊരാളി വിളയില്‍ മുത്തുകുമാറിനെ ആക്രമിച്ച അയല്‍വാസികളായ കുളങ്ങാട്ട് ലിജേഷ് എന്ന അപ്പു, കുരുക്കശ്ശേരി അഭിരാജ് എന്നിവരെയാണ് പോലീസ് അറസ്റ്റ് ചെയ്തത്.
കഴിഞ്ഞ 29ന് രാത്രി 10.30ഓടെ അഭിരാജ് മുത്തുകുമാറിന്റെ വീട്ടിലെത്തി കറി ചോദിക്കുകയായിരുന്നു. ഇതേതുടര്‍ന്നുണ്ടായ തര്‍ക്കത്തിനിടയിലാണ് ലിഗേഷ്, വീട്ടില്‍നിന്ന് കത്തി എടുത്തുകൊണ്ടുവന്ന് മുത്തുകുമാറിനെ ആക്രമിച്ചത്. സംഭവത്തിനുശേഷം മൊബൈല്‍ ഫോണ്‍ സ്വിച്ച്‌ ഓഫ് ചെയ്ത ലിഗേഷിന്റെ സ്കൂട്ടറില്‍ കടന്നുകളഞ്ഞ പ്രതികളെ പിറ്റേന്ന് രാവിലെത്തന്നെ പോലീസ് പിടികൂടുകയായിരുന്നു.
നെടുപുഴ പോലീസ് സ്റ്റേഷന്‍ ഇന്‍സ്പെക്ടര്‍ ടി.ജി. ദിലീപിന്റെ നേതൃത്വത്തില്‍ സബ് ഇന്‍സ്പെക്ടര്‍ അനില്‍, ഓപറേഷന്‍ കാവല്‍ സ്ക്വാഡ് അംഗങ്ങളായ പ്രദീപ്, നവീന്‍, നെടുപുഴ പോലീസ് സ്റ്റേഷനിലെ രതീഷ്, അഭിലാഷ് എന്നിവര്‍ ചേര്‍ന്നാണ് പ്രതികളെ പിടികൂടിയത്.
