ദില്ലി : ബിജെപി ദേശീയ അദ്ധ്യക്ഷസ്ഥാനത്തു നിലവിലെ അദ്ധ്യക്ഷൻ ജെ.പി നദ്ദ തുടരും. അദ്ദേഹത്തിന്റെ കാലാവധി 2024 ജൂൺ വരെ നീട്ടിയതായി പാർട്ടി അറിയിച്ചു. ഡൽഹിയിൽ നടക്കുന്ന ദേശീയ നിർവാഹക സമിതി യോഗത്തിനിടെ കേന്ദ്ര ആഭ്യന്തര മന്ത്രിയും ബിജെപിയുടെ മുതിർന്ന നേതാവുമായ അമിത് ഷായാണ് ഇക്കാര്യം വ്യക്തമാക്കിയത്.
ഇക്കൊല്ലം ഒമ്പത് സംസ്ഥാനങ്ങളിൽ നടക്കുന്ന നിയമസഭാ തിരഞ്ഞെടുപ്പും 2024ലെ പൊതുതിരഞ്ഞെടുപ്പും വരാനിരിക്കുന്ന പശ്ചാത്തലത്തിൽ ദേശീയ അദ്ധ്യക്ഷ ചുമതല ജെ പി നദ്ദയ്ക്ക് തന്നെ നൽകാനാണ് ബിജെപിയുടെ തീരുമാനമെന്ന് അമിത് ഷാ വ്യക്തമാക്കി.
പ്രധാനമന്ത്രി നരേന്ദ്രമോദിയുടെയും ബിജെപി ദേശീയ അദ്ധ്യക്ഷൻ ജെ.പി നദ്ദയുടേയും നേതൃത്വത്തിൽ 2024ലെ പൊതുതിരഞ്ഞെടുപ്പിൽ ബിജെപി വിജയം ആവർത്തിക്കുമെന്നും അമിത് ഷാ പറഞ്ഞു . നിർവാഹക സമിതി യോഗത്തിന് ശേഷം അമിത് ഷാ വിളിച്ചുചേർത്ത മാദ്ധ്യമ കൂടിക്കാഴ്ചയിലാണ് പ്രതികരണം.