ടെഹ്റാൻ: ഭീകരസംഘടനയായ ഹിസ്ബുള്ളയുടെ തലവനായി ഡെപ്യൂട്ടി സെക്രട്ടറി ജനറൽ നയിം ഖാസിമിനെ തെരഞ്ഞെടുത്തു. ഇന്ന് പുറത്തിറക്കിയ പ്രസ്താവനയിലൂടെയാണ് ഹിസ്ബുള്ള ഇക്കാര്യം അറിയിച്ചത്. 71കാരനായ നയിം ഖാസിം സംഘടനയുടെ സ്ഥാപക അംഗങ്ങളിൽ ഒരാൾ കൂടിയാണ്.
1991-ൽ ഹിസ്ബുള്ളയുടെ അന്നത്തെ സെക്രട്ടറി ജനറൽ അബ്ബാസ് അൽ-മുസാവിയാണ് നയിം ഖാസിമിനെ ഹിസ്ബുള്ളയുടെ ഡെപ്യൂട്ടി സെക്രട്ടറി ജനറലായി നിയമിച്ചത്. തൊട്ടടുത്ത വർഷം ഇസ്രായേൽ നടത്തിയ ആക്രമണത്തിൽ മുസാവി കൊല്ലപ്പെട്ടു. പിന്നീട് നസ്റല്ല നേതാവായതിന് ശേഷവും നയിം ഖാസിം തൻ്റെ റോളിൽ തുടരുകയായിരുന്നു.
ഒരു മാസം മുമ്പാണ് ബെയ്റൂട്ടിൻ്റെ തെക്കൻ പ്രാന്തപ്രദേശമായ ദഹിയയിലെ ഒരു കെട്ടിടത്തിന് താഴെയുള്ള ഭൂഗർഭ തുരങ്കം ലക്ഷ്യമാക്കി ഇസ്രായേൽ നടത്തിയ വ്യോമാക്രമണത്തിൽ ഹമാസ് തലവൻ ഹസൻ നസ്രള്ള കൊല്ലപ്പെട്ടത്. പിന്നാലെ ഇയാളുടെ ബന്ധു കൂടിയായ ഹാഷിം സഫീദ്ദീൻ ഹിസ്ബുള്ളയുടെ പുതിയ മേധാവിയായി പ്രഖ്യാപിച്ചു. എന്നാൽ ഒരാഴ്ചയ്ക്ക് ശേഷം ഇസ്രായേലിന്റെ ആക്രമണത്തിൽ സഫീദ്ദീനും കൊല്ലപ്പെടുകയായിരുന്നു.
