കൊട്ടാരക്കര ആസ്ഥാനമായി പ്രവർത്തിക്കുന്ന ഭരത് മുരളി കൾച്ചറൽ സെന്ററിന്റെ 12-ാമത് ചലച്ചിത്ര അവാർഡ് ബഹുഭാഷാ നായിക നടിയും നർത്തകിയുമായ നവ്യാനായർക്കു നൽകി. ഇന്ന് ഉച്ചയ്ക്ക് തിരുവനന്തപുരം പ്രസ്സ് ക്ലബിൽ നടക്കുന്ന ചടങ്ങിൽ മന്ത്രി ജെ.ചിഞ്ചുറാണിയാണ് നടിയ്ക്ക് പുരസ്ക്കാരം സമ്മാനിച്ചത്.
വി.കെ.പ്രകാശ് സംവിധാനം ചെയ്ത “ഒരുത്തി” സിനിമയിലെ അഭിനയമാണു നവ്യയെ അവാർഡിനു അർഹയാക്കിയത്. 25,000/-രൂപയും ഫലകവുമാണ് പുരസ്ക്കാരം.
സംവിധായകൻ ആർ.ശരത് ചെയർമാനും സംവിധായകനും എഴുത്തുകാരനുമായ വിജയകൃഷ്ണൻ, പത്രപ്രവർത്തകരായ പല്ലിശ്ശേരി, എം.കെ.സുരേഷ്, കൾച്ചറൽ സെന്റർ സെക്രട്ടറി അഡ്വ.വി.കെ.സന്തോഷ് കുമാർ എന്നിവർ അംഗങ്ങളായ ജൂറിയാണ് പുരസ്ക്കാരം നിശ്ചയിച്ചത്.
അന്താരാഷ്ട്ര ചലച്ചിത്ര മേളയിലെ ഇന്ത്യൻ പനോരമയിലേക്കു തെരഞ്ഞെടുത്ത “ഭഗവദജ്ജുകം” സിനിമ യുടെ സംവിധായകൻ യദുവിജയകൃഷ്ണനെ മുൻ. എം.പി.പന്ന്യൻ രവീന്ദ്രൻ ആദരിച്ചു.
