നെന്മാറ ഇരട്ടക്കൊലപാതക കേസിലെ പ്രതി ചെന്താമരയ്ക്കായി അന്വേഷണം ഊർജിതമാക്കി പോലീസ്. പോലീസിന്റെ ഡോഗ് സ്‌ക്വാഡ് അടക്കം ഉടൻ സ്ഥലത്തെത്തും. നാല് സംഘങ്ങളായി തിരിഞ്ഞാണ് അന്വേഷണം. പ്രതി പ്രദേശത്തെ അരക്കമലയില്‍ ഒളിവിലാണെന്നാണ് സൂചനകള്‍.
അതേസമയം ഇരട്ടക്കൊലക്കേസില്‍ പോലീസിനെതിരേ ശക്തമായ പ്രതിഷേധമാണുയരുന്നത്. പ്രതി ചെന്താമരയെ കുറിച്ച് നിരന്തരം പരാതികള്‍ നല്‍കിയിട്ടും പോലീസ് അവഗണിച്ചുവെന്നാണ് അയല്‍വാസികളുടെ ആരോപണം. കളക്ടര്‍ സ്ഥലത്തെത്തി ജീവന് സുരക്ഷയുണ്ടാവുമെന്ന ഉറപ്പ് നല്‍കാതെ മൃതദേഹം സംസ്‌കരിക്കാനായി കൊണ്ടുപോവാന്‍ സമ്മതിക്കില്ലെന്ന് നാട്ടുകാര്‍ പറഞ്ഞു.
അതേസമയം, ചെന്താമരയുടെ ജാമ്യം റദ്ദാക്കാനുള്ള നടപടികളിലായിരുന്നു തങ്ങളെന്ന് പോലീസ്. പ്രതി ചെന്താമര ജാമ്യത്തിലിറങ്ങിയിട്ട് രണ്ട് മാസത്തിലേറെയി. പ്രദേശവാസികളും കൊല്ലപ്പെട്ട സുധാകരന്റെ മകള്‍ അഖിലയും നല്‍കിയ പരാതികള്‍ പ്രകാരം ഡിസംബര്‍ 29-ന് ചെന്താമരയെ പോലീസ് സ്‌റ്റേഷനിലേക്ക് വിളിപ്പിച്ച് താക്കീത് നല്‍കിയിരുന്നു. ജാമ്യം റദ്ദാക്കാനുള്ള നടപടികള്‍ ആരംഭിക്കാനിരിക്കെയാണ് സംഭവം. ജാമ്യം റദ്ദാക്കാന്‍ രണ്ട് തവണ കോടതിയെ സമീപിച്ചെങ്കിലും നടന്നില്ലെന്ന് ആലത്തൂര്‍ ഡിവൈഎസ്പി പറഞ്ഞു.
