നല്ല പോഷകാഹാരം കഴിച്ചതുകൊണ്ട് മാത്രമായില്ല, അത് ശരിയായ രീതിയില്‍ കഴിച്ചില്ലെങ്കില്‍
അമിതവണ്ണത്തിനും കുടവയര്‍ വരുന്നതിനും കാരണമാകുന്നു. കുടവയര്‍ ഇന്ന് പുരുഷന്മാരില്‍ മാത്രമല്ല, സ്ത്രീകളിലും അമിതമായി വന്നുകൊണ്ടിരിക്കുകയാണ്. ഇത്തരത്തില്‍ അമിതവണ്ണത്തിലേയ്ക്കും വയറിലേയ്ക്കും നമ്മളെ തള്ളിവിടുന്നതിന്റെ പ്രധാന കാരണങ്ങളില്‍ ഒന്ന് നമ്മള്‍ ആഹാരകാര്യത്തില്‍ കാണിക്കുന്ന ചില അശ്രദ്ധകളാണ്.
പ്രഭാതഭക്ഷണം
ഒരിക്കലും രാവിലത്തെ ഭക്ഷണം കഴിക്കാതിരിക്കരുത്. രാത്രി മുഴുവന്‍ കഴിക്കാതിരുന്ന് നീണ്ട ഇടവേളയ്ക്ക് ശേഷം ശരീരത്തിലേയ്ക്ക് എത്തുന്ന ആഹാരമാണ് പ്രഭാതഭക്ഷണം. അതിനാല്‍ തന്നെ പ്രഭാതഭക്ഷണം ഹെല്‍ത്തി ആക്കിയാല്‍ ഇതിലെപോഷകങ്ങളെല്ലാം ശരീരത്തിലേയ്ക്ക് കൃത്യമായി എത്തുകയും ചെയ്യും.
ദഹനം കൃത്യമായി നടക്കുന്നതിനും ഇതിലൂടെ രക്തത്തിലേയ്ക്ക് കയറുന്ന പഞ്ചസ്സാരയുടെ അളവ് നിയന്ത്രിക്കാനും ഇത് സഹായിക്കുന്നുണ്ട്. ഇത് തടി കുറയ്ക്കാനും ശരീരത്തില്‍ കൊഴുപ്പ് അടിഞ്ഞ് കൂടാതിരിക്കാനും സഹായിക്കുന്നുണ്ട്.
കൃത്യസമയം
എല്ലാ ദിവസവും ഒരേ സമയത്ത് ആഹാരം കഴിച്ച് നോക്കൂ. നിങ്ങള്‍ക്ക് അമിതമായി തടി വെക്കുകയില്ല എന്നത് മാത്രമല്ല, ദഹന പ്രശ്‌നങ്ങളും നിങ്ങള്‍ക്ക് കുറവായിരിക്കും. അതുപോലെ, മൂന്ന് നേരം കൃത്യമായി കഴിക്കാനും നിങ്ങള്‍ മറക്കരുത്. ഇത്തരത്തില്‍ എന്നും കൃത്യസമയത്ത് ആഹാരം കഴിക്കാന്‍ ആരംഭിച്ചാല്‍ നിങ്ങള്‍ക്ക് അമിതമായി വിശപ്പ് അനുഭവപ്പെടാതിരിക്കാന്‍ ഇത് സഹായിക്കും. കൂടാതെ, ശരീരഭാരം നിയന്ത്രിക്കാനും ഇത് സഹായിക്കും.
പാത്രത്തിന്റെ വലിപ്പം
നിങ്ങള്‍ കഴിക്കാന്‍ എടുക്കുന്ന പാത്രം എല്ലായ്‌പ്പോഴും ചെറുതായിരിക്കാന്‍ ശ്രദ്ധിക്കുക. ഇത് ആഹാരം കുറച്ച് എടുക്കുന്നതിന് സഹായിക്കും. കുറച്ച് ആഹാരം കഴിച്ചാല്‍ അത് കൃത്യമായി ദഹിക്കുകയും അതുപോലെ, പോഷകങ്ങള്‍ കൃത്യമായി ശരീരത്തില്‍ എത്തുന്നതിനും ഇത് സഹായിക്കുന്നു. ഇത്തരത്തില്‍ കൃത്യമായി ദഹനം നടക്കുകയും മിതമായ ആളവില്‍ കഴിക്കുന്നത് ശരീരത്തില്‍ കൊഴുപ്പ് അടിയുന്നത് കുറയ്ക്കുന്നു. ഇത് കൂടാതെ, നിങ്ങള്‍ ഇത് സാവധാനത്തില്‍ ചവച്ചരച്ച് കഴിക്കുമ്പോള്‍ വയര്‍ നിറഞ്ഞതായി തലച്ചോറിന് സിഗ്നല്‍ ലഭിക്കുന്നു. അതിനാല്‍ തന്നെ വിശപ്പ് ശമിക്കുകയും ചെയ്യുന്നു. ഇത് വയറും തടിയും കുറയ്ക്കാന്‍ സഹായിക്കും.
ആഹാരങ്ങള്‍ ഒഴിവാക്കരുത്
ചിലര്‍ ഡയറ്റിന്റെ ഭാഗമായി ചില ആഹാരങ്ങള്‍ ഒഴിവാക്കും. പ്രത്യേകിച്ച് ഇഷ്ടമുള്ള ആഹാരങ്ങള്‍ വരെ ഒഴിവാക്കും. എന്നാല്‍, നിങ്ങളുടെ പ്രിയപ്പെട്ട ആഹാരങ്ങള്‍ അമിതമായി ഒഴിവാക്കാതിരിക്കുന്നതാണ് നല്ലത്. കാരണം, നമ്മള്‍ ഇത് ഒഴിവാക്കുംതോറും ഇത് കഴിക്കാനുള്ള കൊതി കൂടുന്നു. ഇത് അമിതമായി കഴിക്കുന്നതിലേയ്ക്ക് നയിക്കും. അതിനാല്‍, മിതമായ അളവില്‍ നിങ്ങള്‍ക്ക് ഓരോന്നും ഡയറ്റില്‍ ചേര്‍ക്കാവുന്നതാണ്.
വെള്ളം
ശരീരത്തിലെ കൊഴുപ്പിനേയും മാലിന്യങ്ങളും കൃത്യമായ രീതിയില്‍ നീക്കം ചെയ്യണമെങ്കില്‍ നന്നായി വെള്ളം കുടിക്കേണ്ടത് അനിവാര്യമാണ്. വെള്ളം എത്തിയാല്‍ മാത്രമാണ് കൃത്യമായി ദഹനം പോലും ശരീരത്തില്‍ നടക്കുകയുള്ളൂ. ദഹനം കൃത്യമായാല്‍ മാത്രമാണ് കൊഴുപ്പ് അടിയാതിരിക്കൂ. അതിനാല്‍ ആഹാരത്തിന് മുന്‍പ് നന്നായി വെള്ളം കുടിക്കുക.
