ന്യൂയോർക്കിലെ ഐക്യരാഷ്ട്രസഭ ആസ്ഥാനത്ത് നടന്ന ആണവ നിർവ്യാപന കരാർ അവലോകന സമ്മേളനത്തിനിടെ അമേരിക്കയും ഇറാനും തമ്മിൽ രൂക്ഷമായ വാക്പോര്. സമ്മേളനത്തിന്റെ വൈസ് പ്രസിഡന്റുമാരിൽ ഒരാളായി ഇറാനെ തെരഞ്ഞെടുത്തതിനെതിരെ അമേരിക്ക രംഗത്തെത്തിയതാണ് തർക്കത്തിന് കാരണമായത്. ആണവ കരാറിനോടുള്ള അവഹേളനമാണ് ഇറാനെ ഈ സ്ഥാനത്തേക്ക് പരിഗണിച്ചതെന്ന് അമേരിക്കൻ പ്രതിനിധി ആരോപിച്ചു.
അമേരിക്കൻ ബ്യൂറോ ഓഫ് ആംസ് കൺട്രോൾ ആൻഡ് നോൺ പ്രൊലിഫെറേഷൻ അസിസ്റ്റന്റ് സെക്രട്ടറി ക്രിസ്റ്റഫർ യീ ആണ് ഇറാനിയൻ പ്രതിനിധിയുടെ തെരഞ്ഞെടുപ്പിനെതിരെ ശക്തമായ വിമർശനം ഉന്നയിച്ചത്. ആണവ പദ്ധതികളെക്കുറിച്ച് ഐക്യരാഷ്ട്രസഭയുടെ ആണവോർജ്ജ ഏജൻസിയുമായി (IAEA) ഇറാൻ സഹകരിക്കുന്നില്ലെന്നും, അത്തരം ഒരു രാജ്യത്തെ ഉത്തരവാദിത്തപ്പെട്ട സ്ഥാനത്ത് അവരോധിക്കുന്നത് കരാറിന്റെ വിശ്വാസ്യതയെ തന്നെ ബാധിക്കുമെന്നും അദ്ദേഹം ചൂണ്ടിക്കാട്ടി. ഈ തെരഞ്ഞെടുപ്പ് അങ്ങേയറ്റം നാണക്കേടാണെന്നും അമേരിക്കൻ പ്രതിനിധി തുറന്നടിച്ചു.
എന്നാൽ അമേരിക്കയുടെ വിമർശനം പൂർണ്ണമായും തള്ളിക്കളഞ്ഞുകൊണ്ട് ഇറാൻ രൂക്ഷമായി തിരിച്ചടിച്ചു. ഇന്റർനാഷണൽ അറ്റോമിക് എനർജി ഏജൻസിയിലെ ഇറാൻ അംബാസഡർ റെസ നജാഫിയാണ് അമേരിക്കയെ കടന്നാക്രമിച്ചത്. രാഷ്ട്രീയ പ്രേരിതമായ ഈ വിമർശനങ്ങൾ തികച്ചും അടിസ്ഥാനരഹിതമാണെന്ന് അദ്ദേഹം വ്യക്തമാക്കി. ലോകത്ത് ആണവായുധം പ്രയോഗിച്ച ഏക രാജ്യമായ അമേരിക്കയ്ക്ക്, മറ്റുള്ള രാജ്യങ്ങളുടെ സുരക്ഷയെയും കരാർ പാലനത്തെയും കുറിച്ച് വിധി കൽപ്പിക്കാൻ യാതൊരു യോഗ്യതയുമില്ലെന്ന് നജാഫി തിരിച്ചടിച്ചു. നിലവിൽ തങ്ങളുടെ ആണവായുധ ശേഖരം ആധുനികവൽക്കരിക്കുന്ന തിരക്കിലാണ് അമേരിക്കയെന്നും അദ്ദേഹം കൂട്ടിച്ചേർത്തു.
അമേരിക്കയും ഇറാനും തമ്മിലുള്ള സംഘർഷം മേഖലയിൽ തുടരുന്നതിനിടയിലാണ് ഇത്തരമൊരു തർക്കം അരങ്ങേറിയത്. തങ്ങളുടെ ആണവ പദ്ധതി സമാധാനപരമായ ആവശ്യങ്ങൾക്ക് വേണ്ടി മാത്രമാണെന്ന് ഇറാൻ ആവർത്തിക്കുമ്പോഴും, ഈ ശേഷി ആണവായുധ നിർമ്മാണത്തിലേക്ക് വഴിതിരിച്ചുവിടാൻ സാധ്യതയുണ്ടെന്ന ആശങ്കയാണ് പാശ്ചാത്യ രാജ്യങ്ങൾ പങ്കുവെക്കുന്നത്. ആണവ വിഷയത്തിൽ ഇരുരാജ്യങ്ങളും തമ്മിലുള്ള ഈ അവിശ്വാസം നിലവിലെ രാഷ്ട്രീയ-സൈനിക സംഘർഷങ്ങളെ കൂടുതൽ സങ്കീർണ്ണമാക്കുകയാണ്.
