ദില്ലി: ലോക്‌സഭയെ ഇനി ഓം ബിര്‍ള നിയന്ത്രിക്കും.
രാജസ്ഥാനില്‍ നിന്നുള്ള ബിജെപി എംപി ഓം ബിര്‍ളയെ ലോകസഭാ സ്പീക്കറായി തിരഞ്ഞെടുത്തു. ഇന്ന് രാവിലെ 11 മണിക്കാണ് സ്പീക്കര്‍ തിരഞ്ഞെടുപ്പ് നടന്നത്.
കോട്ട ലോകസഭ മണ്ഡലത്തില്‍ നിന്ന് തെരഞ്ഞെടുത്ത ഓം ബിര്‍ള ഇത് രണ്ടാം തവണയാണ് ലോകസഭയില്‍ എത്തുന്നത്. രാജസ്ഥാനിലെ ബിജെപിയുടെ പ്രമുഖ വൈശ്യ നേതാവാണ് അദ്ദേഹം. ഇത്തവണ കോണ്‍ഗ്രസ് സ്ഥാനാര്‍ത്ഥിയെ 2,79,677 വോട്ടുകള്‍ക്കാണ് അദ്ദേഹം തോല്പിച്ചത്. 2003 മുതല്‍ തുടര്‍ച്ചയായി മൂന്ന് തവണ അദ്ദേഹം നിയമസഭാംഗമായിരുന്നു. നേരത്തെ രാജസ്ഥാന്‍ മന്ത്രിസഭയില്‍ അംഗമായിരുന്നു ഓം ബിര്‍ള.
മേനക ഗാന്ധിയുള്‍പ്പെടെയുള്ളവരുടെ പേരുകള്‍ നേരത്തെ സ്പീക്കര്‍ സ്ഥാനത്തേക്ക് പരിഗണിക്കുന്നതായി റിപ്പോര്‍ട്ടുകളുണ്ടായിരുന്നു. അതിനിടെയാണ് ഓം ബിര്‍ളയുടെ പേര് പുറത്തുവന്നത്.
പ്രതിപക്ഷം സ്ഥാനാര്‍ത്ഥിയെ നിറുത്തിയില്ല. എന്‍ഡിഎയുടെ ഘടകകക്ഷികള്‍ അല്ലാത്ത വൈഎസ്ആര്‍ കോണ്‍ഗ്രസും ബിജു ജനതാദളും ഉള്‍പ്പെടെ പത്ത് കക്ഷികള്‍ ഓം ബിര്‍ളയ്ക്ക് പിന്തുണ പ്രഖ്യാപിച്ചിരുന്നു.
