തൃശൂർ: തൃശൂരിൽ സ്വകാര്യ ബസുകളുടെ മത്സരയോട്ടത്തിൽ സ്വന്തം ബസിടിച്ച് യുവാവ് മരിച്ചു. ആയമുക്ക് പോഴംകണ്ടത്ത് വീട്ടിൽ രാഘവന്റെ മകൻ രജീഷാണ് മരിച്ചത്. ബസിലേക്ക് ഓടിക്കയറുന്നതിനിടെ പിടിവിട്ട് റോഡിലേക്ക് വീണ രജീഷിന്റെ ദേഹത്ത് അതേ ബസ് കയറിയിറങ്ങുകയായിരുന്നു.
കഴിഞ്ഞ ദിവസം വൈകീട്ട് 6;15 ഓടെ പുറ്റേക്കര സെന്ററിലായിരുന്നു അപകടം. പരിക്കേറ്റ രജീഷിനെ നാട്ടുകാർ ഉടനെ ആശുപത്രിയിലെത്തിച്ചെങ്കിലും രക്ഷിക്കാനായില്ല.
അപകടത്തിൽപ്പെട്ട വെണ്ണിലാവ് ബസ് മറ്റൊരു സ്വകാര്യബസിനെ മറികടക്കാൻ ശ്രമിക്കുമ്പോഴാണ് അപകടം സംഭവിച്ചത്. കണ്ടക്ടറായാണ് തിങ്കളാഴ്ച രജീഷ് ബസിലുണ്ടായിരുന്നത്. സംഭവത്തിൽ പേരാമംഗലം പോലീസ് അന്വേഷണം ആരംഭിച്ചു.
