കാസര്കോട്: പെരിയ ഇരട്ടക്കൊലക്കേസില് പുനരന്വേഷണം ആവശ്യപ്പെട്ട് കുടുംബങ്ങള്. കൃപേഷിന്റേയും ശരത് ലാലിന്റെയും കുടുംബങ്ങളാണ് പുനരന്വേഷണം ആവശ്യപ്പെട്ടത്. കുറ്റകൃത്യത്തിലും ഗൂഡാലോചനയിലും പങ്കെടുത്ത ചിലരിലേക്ക് അന്വേഷണം വ്യാപിപ്പിക്കണമെന്നാണ് അവരുടെ ആവശ്യം. ഇടപെടല് തേടി ഉടന് കോടതിയെ സമീപിക്കുമെന്നും ശരത് ലാലിന്റെ അച്ഛൻ പറഞ്ഞു.
ഡിസംബര് മൂന്നിന് സിബിഐ 24 പേരെ പ്രതിചേര്ത്ത് കുറ്റപത്രം സമര്പ്പിച്ചിട്ടുണ്ടെങ്കിലും കൂടുതല് പ്രതികളുണ്ടെന്നാണ് കൊല്ലപ്പെട്ട ശരത് ലാലിന്റെയും കൃപേഷിന്റെയും കുടുംബങ്ങളുടെ ആരോപണം.
എറണാകുളം സിജെഎം കോടതിയില് സിബിഐ സമര്പ്പിച്ച കുറ്റപത്രത്തിന്റെ പകര്പ്പ് കിട്ടിയ ശേഷം തുടരന്വേഷണ ഹര്ജി നല്കുമെന്ന് ശരത് ലാലിന്റെ അച്ഛന് സത്യനാരായണന് പറഞ്ഞു.
