കോട്ടയം: കവിയും പുല്ലാങ്കുഴൽ കലാകാരനുമായ ബിനു എം പള്ളിപ്പാട് അന്തരിച്ചു. കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കെയായിരുന്നു അന്ത്യം. പാൻക്രിയാസിലെ രോഗബാധയാണ് മരണത്തിലേയ്ക്ക് നയിച്ചത്. സംസ്കാരം സ്വദേശമായ ഹരിപ്പാട് നടക്കും.
1974ൽ ഹരിപ്പാടിന് സമീപം പള്ളിപ്പാടെന്ന സ്ഥലത്താണ് ജനനം. പള്ളിപ്പാട് നടുവട്ടം ഹൈസ്കൂളിലും പരുമല ദേവസ്വം ബോർഡ് കോളജിലുമായി വിദ്യാഭ്യാസം പൂർത്തിയാക്കി.
1993 മുതൽ ആനുകാലികങ്ങളിൽ കവിതകൾ എഴുതുന്നു. കവിതയോടൊപ്പം പുല്ലാങ്കുഴലും അഭ്യസിച്ച അദ്ദേഹം, ബാവുൽ ഗായകർക്കൊപ്പം കേരളത്തിലും വടക്കുകിഴക്കൻ സംസ്ഥാനങ്ങളിലും യാത്ര ചെയ്ത് സംഗീത പരിപാടികൾ അവതരിപ്പിച്ചു.
