ചിതറയിൽ പോലീസുകാരെ ആക്രമിച്ച കേസിൽ മൂന്നംഗ സംഘം റിമാൻഡിൽ. വനിതാ എസ്‌ഐയെ അടക്കമുള്ള പോലീസുകാർക്കാണ് മർദ്ദനമേറ്റത്. സംഭവത്തിൽ വെങ്ങോല സ്വദേശികളായ സജിമോൻ, വിനീത്, രാജീവ് എന്നിവരാണ് പിടിയിലായത്. സ്ത്രീത്വത്തെ അപമാനിക്കൽ, കൃത്യനിർവ്വഹണം തടസപ്പെടുത്തൽ പൊതുമുതൽ നശിപ്പിക്കൽ പോലീസിനെ ആക്രമിച്ച് പരിക്കേൽപ്പിക്കൽ തുടങ്ങിയ വകുപ്പുകൾ പ്രകാരമാണ് ഇവർക്കെതിരെ കേസ് ചാർജ് ചെയ്തിരിക്കുന്നത്.
കഴിഞ്ഞ ദിവസം രാത്രിയോടെയായിരുന്നു സംഭവം. അരിപ്പ അമ്മയമ്പലം ശിവക്ഷേത്രത്തിലെ ഉത്സവത്തിന് സുരക്ഷയൊരുക്കുന്നതിന്റെ ഭാഗമായാണ് പോലീസ് എത്തിയത്. ഇതിനിടെ എസ്‌ഐയുടെ വാഹനത്തിന് മുൻപിൽഎത്തിയ മൂന്നംഗ സംഘം നൃത്തം ചെയ്ത് തടസം ഉണ്ടാക്കുകയായിരുന്നു. പോലീസ് വാഹനത്തിന് മുന്നോട്ട് പോകാൻ കഴിയാത്തതിനെ തുടർന്ന് എസ്ഐ വാഹനത്തിൽ നിന്നും ഇറങ്ങി യുവാക്കളോട് മാറാൻ ആവശ്യപ്പെട്ടു. എന്നാൽ ഇവർ എസ്‌ഐയെ തടഞ്ഞു നിർത്തുകയും ജീപ്പ് ആക്രമിക്കുകയും പോലീസുകാരെ മർദ്ദിക്കുകയും ചെയ്തു. തുടർന്ന് കൂടുതൽ പോലീസ് സ്ഥലത്ത് എത്തിയാണ് സ്ഥിതിഗതികൾ നിയന്ത്രണത്തിലാക്കിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
