ദില്ലി : വരാനിരിക്കുന്ന ലോക്സഭാ തിരഞ്ഞെടുപ്പിന് മുന്നോടിയായി പ്രധാനമന്ത്രി നരേന്ദ്രമോദി കേരളത്തില്‍ മൂന്ന് തവണ എത്തിയേക്കുമെന്ന റിപ്പോര്‍ട്ട് പുറത്ത് വന്നു. ഈ മാസം ഒരു തവണയും അടുത്ത മാസം രണ്ട് തവണയും അദ്ദേഹം കേരളം സന്ദർശിക്കുമെന്നാണ് സൂചന. കൊച്ചിന്‍ ഷിപ്പ് യാര്‍ഡ്, ദേശീയ പാത, കൊച്ചി മെട്രോ എന്നിവയുമായി ബന്ധപ്പെട്ട് മൂന്ന് പരിപാടികളിലാവും അദ്ദേഹം പങ്കെടുക്കുകയെന്ന് ഒരു ദേശീയ വാർത്താ ഏജൻസി റിപ്പോർട്ട് ചെയ്തു.
ഈ മാസം മൂന്നാം തീയതി തൃശ്ശൂരിൽ നടത്തിയ പ്രധാനമന്ത്രിയുടെ റോഡ്‌ഷോയും മഹിളാ സമ്മേളനവും വലിയ വിജയമായിരുന്നു. ഇനി അദ്ദേഹം എത്തുന്നത് വിവിധ പദ്ധതികളുമായി ബന്ധപ്പെട്ട് ഔദ്യോഗിക സന്ദര്‍ശനമായിരിക്കുമെന്നാണ് കരുതുന്നത്. അതെ സമയം തൃശ്ശൂരിലെ പരിപാടി പ്രവർത്തകരുടെ ആവേശവും ആത്മവീര്യവും വർദ്ധിപ്പിച്ചുവെന്നാണ് കരുതുന്നത്.വരുന്ന ലോക്സഭാ തെരഞ്ഞെടുപ്പിൽ ബിജെപിക്ക് ഏറെ വിജയ സാധ്യത കൽപ്പിക്കുന്ന മണ്ഡലം കൂടിയാണ് തൃശ്ശൂർ.
