ഭുവനേശ്വർ: രാജ്യത്തെ നടുക്കിയ ട്രെയിൻ അപകടമുണ്ടായ ഒഡീഷയിലെ ബാലസോറിലെ സ്ഥിതിഗതികൾ നേരിട്ട് വിലയിരുത്താൻ പ്രധാനമന്ത്രി നരേന്ദ്ര മോദി എത്തും. അപകടം നടന്ന സ്ഥലത്തേക്കാണ് പ്രധാനമന്ത്രി ആദ്യം സന്ദർശിക്കുകയെന്ന് അദ്ദേഹത്തിന്റെ ഓഫീസ് അറിയിച്ചു. പിന്നീട് അപകടത്തിൽ പരിക്കേറ്റവർ കഴിയുന്ന ആശുപത്രി സന്ദർശിക്കും. കേന്ദ്രമത്രി അമിത് ഷായും അപകടസ്ഥലം സന്ദർശിച്ചേക്കും.
ഇന്ന് ഗോവയിൽ വന്ദേ ഭാരത് എക്സ്പ്രസിന്റെ കന്നിയാത്ര ഉദ്ഘാടനം ചെയ്യാനിരുന്നതായിരുന്നു പ്രധാനമന്ത്രി. എന്നാൽ ഒഡീഷ ട്രെയിൻ ദുരന്തത്തിനു പിന്നാലെ പരിപാടി റദ്ദാക്കി. ഒഡീഷയിലെ ട്രെയിൻ ദുരന്തത്തിനു പിന്നാലെ സ്ഥിതിഗതികൾ വിലയിരുത്താൻ പ്രധാനമന്ത്രി മുതിർന്ന റെയിൽവേ ഉദ്യോഗസ്ഥരുടെ ഉന്നതലയോഗം വിളിച്ചിരുന്നു.
വെള്ളിയാഴ്ച വൈകീട്ട് ഏഴുമണിയോടെയാണ് ട്രെയിൻ അപകടമുണ്ടായത്. യശ്വന്ത്പുരിൽ നിന്ന് ഹൗറയിലേക്ക് പോവുകയായിരുന്ന സൂപ്പർ ഫാസ്റ്റ് എക്സ്പ്രസ്(12864), ഷാലിമാർ-ചെന്നൈ കോറമണ്ഡൽ എക്സ്പ്രസ്(12841), ചരക്കു തീവണ്ടി എന്നിവയാണ് അപകടത്തിൽ പെട്ടത്. യശ്വന്ത്പുരിൽ നിന്ന് ഹൗറയിലേക്ക് പോവുകയായിരുന്നു ട്രെയിൻ പാളം തെറ്റി തൊട്ടടുത്ത ട്രാക്കിലേക്ക് വന്ന കോറമണ്ഡൽ എക്സ്പ്രസ് ഈ കോച്ചുകളിലേക്ക് വന്ന് ഇടിച്ചതോടെയാണ് വൻ അപകടമുണ്ടായത്. ഇതിനു പിന്നാലെ ചരക്കു തീവണ്ടിയും വന്നിടിക്കുകയായിരുന്നു.
