തിരുവനന്തപുരം: രാജ്യം പത്മശ്രീ പുരസ്കാരം നൽകി ആദരിച്ച ശിവഗിരി ശ്രീനാരായണ ധർമ സംഘം ട്രസ്റ്റ് പ്രസിഡന്റ് സ്വാമി വിശുദ്ധാനന്ദയെ ബഹറിനിലെ പ്രവാസി ഇന്ത്യൻ സമൂഹം ആദരിക്കുന്നു. ഇന്ന് ബഹ്‌റിൻ സമയം വൈകിട്ട് 7: 30 നാണ് ചടങ്ങ്. ബഹറിനിലെ ഇന്ത്യൻ സമൂഹവും കേരള സമാജവും സംയുക്തമായാണ് പരിപാടി സംഘടിപ്പിക്കുന്നത്. പരിപാടിയിൽ മുൻ മിസോറം ഗവർണർ കുമ്മനം രാജശേഖരൻ, തിരുവഞ്ചൂർ രാധാകൃഷ്ണൻ എം എൽ എ, മുൻ എം പി ഡോ. എ സമ്പത്ത് എന്നിവർ മുഖ്യാതിഥികളാകും. ആദരിക്കൽ ചടങ്ങിന് ശേഷം സിനിമാതാരം മഞ്ജു വാര്യരുടെ നൃത്ത നൃത്യങ്ങൾ അരങ്ങേറും .
പ്രവാസി വ്യവസായിയും ശിവഗിരി തീർത്ഥാടന കമ്മിറ്റി വർക്കിംഗ് ചെയർമാനുമായ കെ ജി. ബാബുരാജ്, ബഹറിൻ കേരളീയ സമാജം പ്രസിഡന്റ് പി വി. രാധാകൃഷ്ണപിള്ള എന്നിവർ ആദരിക്കൽ ചടങ്ങിന് നേതൃത്വം നൽകും. ശിവഗിരി ശ്രീനാരായണ ധർമ്മസംഘം ട്രസ്റ്റ് ജനറൽ സെക്രട്ടറി സ്വാമി സാന്ദ്രാനന്ദ, തീർത്ഥാടന കമ്മിറ്റി സെക്രട്ടറി സ്വാമി വിശാലാനന്ദ, ആലുവ അദ്വൈതാശ്രമം സെക്രട്ടറി സ്വാമി ശിവസ്വരൂപാനന്ദ, ശിവഗിരി തീർത്ഥാടന മീഡിയ കമ്മിറ്റി ചീഫ് കോ-ഓർഡിനേറ്റർ വണ്ടന്നൂർ സന്തോഷ് എന്നിവരും ചടങ്ങിൽ പങ്കെടുക്കും.
