ചെന്നൈ: തമിഴ്നാട്ടിൽ സി.ഐ.എസ്.എഫിന്റെ വെടിയേറ്റ് (CISF Gun Shot Hits Boys Head) 11 കാരന് ഗുരുതര പരിക്ക്.
തമിഴ്നാട്ടിലെ പുതുക്കോട്ടയിൽ ആണ് സംഭവം. സി.ഐ.എസ്.എഫിന്റെ ഷൂട്ടിങ് പരിശീലനത്തിനിടെ അബദ്ധത്തിൽ കുട്ടിയ്ക്ക് വെടിയേൽക്കുകയായിരുന്നു എന്നാണ് നിഗമനം. വീടിന് മുന്നിൽ കളിച്ചുകൊണ്ടിരുന്ന കുട്ടിയുടെ തലയ്ക്കാണ് വെടിയേറ്റത്. അതേസമയം, ഇക്കാര്യത്തിൽ കൂടുതൽ പ്രതികരണത്തിന് തമിഴ്നാട് പോലീസോ സി.ഐ.എസ്.എഫോ തയ്യാറായിട്ടില്ല.
പുതുക്കോട്ടയിൽ നരത്താമലയിലാണ് സംഭവം. പരിക്കേറ്റ കുട്ടിയെ ഉടൻ പുതുക്കോട്ട ഗവൺമെന്റ് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പിന്നീട് വിദഗ്ധ ചികിത്സക്കായി തഞ്ചാവൂർ മെഡിക്കൽ കോളജിലേക്ക് മാറ്റി. ഷൂട്ടിങ് പരിശീലനത്തിനിടെ ബുള്ളറ്റുകളിലൊന്ന് ലക്ഷ്യം തെറ്റുകയായിരുന്നുവെന്നാണ് പോലീസിന്റെ നിഗമനം. സംഭവത്തെക്കുറിച്ച് അന്വേഷണം ആരംഭിച്ചതായി പോലീസ് അറിയിച്ചു. സി.ഐ.എസ്.എഫ് ഉദ്യോഗസ്ഥരോട് പോലീസ് പ്രാഥമികമായി വിവരങ്ങൾ ചോദിച്ചറിഞ്ഞു.