ദില്ലി: രാജ്യത്തെ നടുക്കിയ പുൽവാമ ഭീകരാക്രമണത്തിന് ഇന്ന് മൂന്ന് ആണ്ട്. ഭാരതം ഒരിക്കലും മറക്കാത്ത ഈ ദിനത്തിൽ വീരമൃത്യുവരിച്ച സൈനികർക്ക് ആദരാഞ്ജലികൾ അർപ്പിച്ച് പ്രധാനമന്ത്രി നരേന്ദ്രമോദിയും കേന്ദ്ര ആഭ്യന്തര മന്ത്രി അമിത് ഷായും(Pulwama Day Remembering PM Modi And Amit Shah). ധീരജവാന്മാരുടെ ജീവത്യാഗം ശക്തമായ രാജ്യം പടുത്തുയർത്താൻ ഓരോരുത്തർക്കും പ്രചോദനമാണെന്ന് അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹം ജവാന്മാരെ അനുസ്മരിച്ചത്. അതേസമയം പുൽവാമയിൽ വീരമൃത്യുവരിച്ച സൈനികർക്ക് കേന്ദ്ര ആഭ്യന്തര മന്ത്രി അമിത് ഷായും ആദരവ് അർപ്പിച്ചു.
പ്രധാനമന്ത്രിയുടെ ട്വീറ്റിന്റെ പൂർണ്ണരൂപം:
“2019 ഫെബ്രുവരി 14 ന് പുൽവാമയിൽ വീരമൃത്യുവരിച്ച സൈനികർക്ക് ആദരാഞ്ജലികൾ അർപ്പിക്കുന്നു. ഈ ദിനത്തിൽ രാജ്യത്തിന് വേണ്ടി അവർ നൽകിയ സേവനങ്ങളെ ഓർക്കുന്നു. ശക്തവും, സമൃദ്ധവുമായ ഒരു രാജ്യം പടുത്തുയർത്തുന്നതിനായി പ്രവർത്തിക്കാൻ ജവാന്മാരുടെ ജീവത്യാഗവും ധീരതയും പ്രചോദനമാണ്” എന്നായിരുന്നു പ്രധാനമന്ത്രിയുടെ ട്വീറ്റ്.
അമിത് ഷായുടെ ട്വീറ്റ്:
“ഭീകരാക്രമണത്തിൽ ജീവൻ നൽകി നമ്മുടെ രാജ്യത്തിന്റെ പരമാധികാരം ഉയർത്തിപ്പിടിച്ച സൈനികർക്ക് ആദരാഞ്ജലികൾ. രാജ്യം നിങ്ങളോട് കടപ്പെട്ടിരുന്നു. ഭീകരവാദത്തിന്റെ വേര് അറുക്കാൻ നിങ്ങളുടെ ഓരോരുത്തരുടെയും ധീരത പ്രചോദിപ്പിച്ചുകൊണ്ടേയിരിക്കുമെന്നും” അമിത് ഷാ ട്വീറ്റിൽ പറഞ്ഞു.
