ദില്ലി: യുവ നടിക്ക് നേരെയുള്ള ബലാത്സംഗ കേസിൽ നടൻ സിദ്ദിഖ് സമർപ്പിച്ച മുൻകൂർ ജാമ്യാപേക്ഷ സുപ്രീംകോടതി ഇന്ന് പരിഗണിക്കും. കേസ് സംബന്ധിച്ചുള്ള അന്വേഷണത്തിന്റെ ഭാഗമായി, സിദ്ദിഖും പ്രത്യേക അന്വേഷണ സംഘവും സത്യവാങ്മൂലം സമർപ്പിച്ചിട്ടുണ്ട്.
സിദ്ദിഖ് തന്റെ സത്യവാങ്മൂലത്തിൽ, അന്വേഷണവുമായി സഹകരിക്കുകയാണെന്നും തന്റെ പക്കലുണ്ടായ എല്ലാ തെളിവുകളും അന്വേഷണ ഉദ്യോഗസ്ഥർക്ക് കൈമാറിയതായും വ്യക്തമാക്കിയിട്ടുണ്ട്.
ഇതിനിടെ, സിദ്ദിഖിന്റെ അറസ്റ്റ് ആവശ്യപ്പെടുന്ന നിലപാടിലാണ് പോലീസ്. നടൻ സ്ത്രീത്വത്തെ അപമാനിച്ചുവെന്നും, അതിജീവിതയോട് മോശമായ പെരുമാറ്റം കാട്ടിയെന്നും പോലീസ് നൽകിയ സത്യവാങ്മൂലത്തിൽ പറയുന്നു. കൂടാതെ, സമൂഹമാധ്യമങ്ങളിൽ നിന്ന് തെളിവുകൾ ശേഖരിക്കുന്നതിന്റെ സങ്കീർണതയെ മറികടക്കാൻ സിദ്ദിഖിനെ അറസ്റ്റ് ചെയ്ത് ചോദ്യം ചെയ്യേണ്ടതുണ്ടെന്ന് പോലീസ് ആവശ്യപ്പെട്ടിട്ടുണ്ട്.
