കൊച്ചി: അധോലോക കുറ്റവാളി രവി പൂജാരി പി.സി ജോര്ജ് എം.എല്.എയെ വിളിച്ചതിന്റെ തെളിവ് അന്വേഷണ ഏജന്സികള്ക്ക് ലഭിച്ചു. സെനഗലില് നിന്ന് നാല് ഇന്റര്നെറ്റ് കോള് വന്നതായി കേന്ദ്ര ഏജന്സികള് സ്ഥിരീകരിച്ചു. രവി പൂജാരി ഭീഷണിപ്പെടുത്തിയതായി പി.സി ജോര്ജ് കഴിഞ്ഞ ദിവസം വെളിപ്പടുത്തിയിരുന്നു. ആഫ്രിക്കയില് നിന്ന് നെറ്റ് കോള് വഴി തനിക്കെതിരെ വധഭീഷണി വന്നിരുന്നുവെന്നാണ് പി.സി.ജോര്ജ് അറിയിച്ചിരുന്നത്. രവി പൂജാരിയാണ് തന്നെ ഭീഷണിപ്പെടുത്തിയതെന്ന് കാട്ടി പൊലീസില് പരാതി നല്കിയതായും അദ്ദേഹം അറിയിച്ചിരുന്നു. ഇക്കാര്യമാണ് ഇപ്പോള് അന്വേഷണ സംഘം സ്ഥിരീകരിച്ചിരിക്കുന്നത്.
‘രണ്ടാഴ്ച മുമ്പ് ആഫ്രിക്കയില്നിന്ന് എനിക്ക് ഒരു നെറ്റ് കോള് വന്നു. ആദ്യം അയാള് നിങ്ങള്ക്കയച്ച സന്ദേശം വായിച്ചില്ലേ എന്നു ചോദിച്ചു. സമയം കിട്ടിയില്ലെന്ന് പറഞ്ഞപ്പോള് താന് രവി പൂജാരിയാണെന്ന് അയാള് വെളിപ്പെടുത്തി. പിന്നീട് എന്നെയും രണ്ടു മക്കളില് ഒരാളെയും തട്ടിക്കളയുമെന്ന് ഭീഷണിപ്പെടുത്തി. നീ പോടാ റാസ്കല്, നിന്റെ വിരട്ടല് എന്റെ അടുത്ത് നടക്കില്ലെടാ ഇഡിയറ്റ് എന്ന് അറിയാവുന്ന ഇംഗ്ലീഷില് താനും മറുപടി പറഞ്ഞു.-പി.സി ജോര്ജ് പറഞ്ഞു. സംഭവത്തിന് ശേഷം മുഖ്യമന്ത്രിക്കും, പൊലീസ് മേധാവിക്കും പി.സി ജോര്ജ് പരാതി നല്കിയിരുന്നു. ഇതില് അന്വേഷണം നടന്നുവരുന്നതിനാല് സംഭവം പുറത്ത് പറഞ്ഞില്ലെന്നും പി.സി ജോര്ജ് പറയുന്നു. പൊലീസ് നിര്ദേശിച്ചത് അനുസരിച്ചാണ് മിണ്ടാതിരുന്നതെന്നും അദ്ദേഹം പറഞ്ഞു.