കൊടുങ്ങല്ലൂർ: കൊടുങ്ങല്ലൂരിൽ റിൻസിയെ വെട്ടിക്കൊലപ്പെടുത്തിയ (Rincy Murder) പ്രതി റിയാസ് തൂങ്ങിമരിച്ച നിലയിൽ. ഇയാളുടെ മൃതദേഹം എറിയാട്ടെ ആളൊഴിഞ്ഞ പറമ്പിലാണ് കണ്ടെത്തിയത്. ഇക്കഴിഞ്ഞ ദിവസം രാത്രിയാണ് മക്കളുടെ മുമ്പില്‍വച്ച് റിന്‍സിയെ അതിക്രൂരമായി റിയാസ് ആക്രമിച്ചത്. സംഭവത്തിന് ശേഷം ഒളിവില്‍ പോയ റിയാസിനായി പോലീസ് അന്വേഷണം നടത്തിവരികയായിരുന്നു.
ഇതിനുപിന്നാലെയാണ് ഇന്ന് രാവിലെയോടെ റിയാസിനെ മരിച്ചനിലയില്‍ കണ്ടെത്തിയത്. റിയാസിന്റെ ആക്രമണത്തിൽ ഗുരുതരമായി പരിക്കേറ്റ റിൻസി ആശുപത്രിയിൽ വച്ചാണ് മരിച്ചത്. അതേസമയം റിൻസിയുടെ കടയിൽ നേരത്തെ ജോലിക്ക് നിന്നിരുന്ന ആളായിരുന്നു റിയാസ്. എറിയാട് കേരളവർമ്മ ഹയർ സെക്കണ്ടറി സ്കൂളിന് സമീപം തുണിക്കട നടത്തുകയായിരുന്നു കൊല്ലപ്പെട്ട റിൻസി. ജോലി കഴിഞ്ഞ് ഏഴരയ്ക്ക് കട അടച്ച് മക്കളോടൊപ്പം വീട്ടിലേക്ക് മടങ്ങവേയാണ് യുവതിയെ റിയാസ് തടഞ്ഞുനിര്‍ത്തി വെട്ടിയത്. തലയ്ക്കും കഴുത്തിനും ഉള്‍പ്പെടെ 30 ലേറെ വെട്ടുകളാണ് റിന്‍സിക്കേറ്റത്.
മൂന്ന് കൈ വിരലുകള്‍ അറ്റനിലയിലായിരുന്നു റിൻസിയെ ആശുപത്രിയിലെത്തിച്ചത്. അതേസമയം റിയാസിന്റെ ശല്യത്തെക്കുറിച്ച് പോലീസില്‍ റിൻസി നേരത്തെ പരാതിപ്പെട്ടിരുന്നു. തുടര്‍ന്ന് പോലീസ് റിയാസിനെ താക്കീത് ചെയ്ത് വിട്ടയക്കുകയായിരുന്നു. ഇതിനെ തുടര്‍ന്നുള്ള വൈരാഗ്യമാണ് ആക്രമണത്തിന് കാരണമെന്നാണ് കരുതുന്നത്.
