തൃശൂർ: കൊടുങ്ങല്ലൂരിൽ വെട്ടേറ്റ ടെക്സ്റ്റൈൽസ് ഉടമയായ യുവതി മരിച്ച സംഭവത്തിൽ, കൂടുതൽ വിവരങ്ങൾ പുറത്ത്. എറിയാട് ബ്ലോക്ക് ഓഫീസിന് തെക്ക് മാങ്ങാറ പറമ്പിൽ നാസറിന്റെ ഭാര്യ റിൻസി (30) ആണ് മരിച്ചത്. വെട്ടേറ്റ് ഗുരുതരാവസ്ഥയിൽ കഴിയുകയായിരുന്ന യുവതി ഇന്ന് രാവിലെയോടെയായിരുന്നു മരണം. ഏകദേശം മുപ്പതോളം വെട്ടുകളാണ് ശരീരത്തിലുണ്ടായിരുന്നത്.
കഴിഞ്ഞദിവസം രാത്രി എട്ടുമണിക്കാണ് ക്രൂരമായ ആക്രമണം നടന്നത്. എറിയാട് കേരള വർമ സ്കൂളിന് സമീപം ഭർത്താവിനൊപ്പം വസ്ത്രാലയം നടത്തുന്ന റിൻസി കടയിൽനിന്ന് വീട്ടിലേക്ക് മടങ്ങുമ്പോഴായിരുന്നു ആക്രമണം. ഏറിയാട് വച്ച് തടഞ്ഞുനിർത്തി റിയാസ് യുവതിയെ വെട്ടുകയായിരുന്നു. കൈയ്ക്കും തലയ്ക്കും മറ്റും പരിക്കേറ്റ റിൻസിയെ കൊടുങ്ങല്ലൂർ ചന്തപ്പുര എ.ആർ. മെഡിക്കൽ സെന്ററിൽ പ്രവേശിപ്പിക്കുകയായിരുന്നു. സംഭവത്തിന് പിന്നാലെ, അക്രമി രക്ഷപ്പെടുകയായിരുന്നു. യുവതിയെ ആക്രമിച്ച പ്രതി റിയാസ് ഒളിവിലാണ്.
സംഭവത്തിൽ കടയിലെ മുൻ ജീവനക്കാരനായ റിയാസിനായി പോലീസ് തിരച്ചിൽ തുടരുകയാണ്. ഇയാൾക്കെതിരെ, യുവതി നേരത്തേ പരാതി നൽകിയിരുന്നു. ഇതിലുള്ള പ്രതികാരമാണ് ആക്രമണത്തിന് പിന്നിലെന്നാണ്, പൊലീസിന്റെ കണ്ടെത്തൽ. എറിയാട് കേരള വർമ്മ സ്‌ക്കൂളിന് സമീപമുള്ള വസ്ത്രാലയം അടച്ച് മക്കളോടൊപ്പം വീട്ടിലേക്ക് പോകുമ്പോഴായിരുന്നു സംഭവം.
ആളൊഴിഞ്ഞ സ്ഥലത്ത് മറഞ്ഞുനിന്ന അക്രമി പെടുന്നനെ അക്രമം നടത്തുകയായിരുന്നു. അതുവഴി വന്ന, ബൈക്ക് യാത്രികർ ബഹളം വെച്ചതിനെ തുടർന്ന് റിയാസ് സ്ഥലംവിട്ടു. കൊടുങ്ങല്ലൂർ ഡിവൈ.എസ്.പി സലീഷ് എൻ. ശങ്കരന്റെ നേതൃത്വത്തിൽ പൊലീസ് സംഘം സ്ഥലത്തെത്തി അന്വേഷണം ആരംഭിച്ചു.
