യാങ്കൂൺ: മ്യാൻമർ തീരത്തുണ്ടായ രണ്ട് വൻ ബോട്ട് അപകടങ്ങളിൽ 500 പേർ മുങ്ങി മരിച്ചു. റോഹിങ്ക്യൻ അഭയാർത്ഥികൾ സഞ്ചരിച്ചിരുന്ന ബോട്ടാണ് അപകടത്തിൽ പെട്ടത്. യു.എന്നിന്റെ ഇന്റർനാഷണൽ ഓർഗനൈസേഷൻ ഫോർ മൈഗ്രേഷനും (IOM) അഭയാർത്ഥി ഏജൻസിയായ യു.എൻ.എച്ച്.സി.ആറും (UNHCR) സംയുക്തമായി പുറത്തിറക്കിയ പ്രസ്താവനയിലാണ് ഈ ഞെട്ടിക്കുന്ന വിവരമുള്ളത്. ജൂൺ അവസാനത്തോടെ ആഭ്യന്തര യുദ്ധം രൂക്ഷമായ മ്യാൻമറിലെ രഖൈൻ സംസ്ഥാനത്തുനിന്നും, ബംഗ്ലാദേശിലെ കോക്‌സ് ബസാർ അഭയാർത്ഥി ക്യാമ്പുകളിൽ നിന്നുമായി തിരിച്ച ബോട്ടുകളാണ് അപകടത്തിൽപ്പെട്ടതെന്നാണ് പ്രാഥമിക വിവരം.
അപകടത്തിൽപ്പെട്ട ആദ്യ ബോട്ടിൽ 250 ഓളം ആളുകൾ ഉണ്ടായിരുന്നതായും യാത്ര തിരിച്ച് അധികം വൈകാതെ തന്നെ ഈ ബോട്ടുമായുള്ള ബന്ധം നഷ്ടപ്പെട്ടതായും യു.എൻ വ്യക്തമാക്കുന്നു. രണ്ടാമത്തെ ബോട്ടിൽ ഏതാണ്ട് 280-ഓളം യാത്രക്കാരുണ്ടായിരുന്നു. ഈ ബോട്ട് ജൂലൈ എട്ടിന് മ്യാൻമറിന്റെ അയ്യർവാടി തീരക്കടലിൽ മുങ്ങിയതായാണ് വിവരം. സാധാരണയായി കടൽയാത്രകൾക്ക് അനുയോജ്യമല്ലാത്ത കാലവർഷ സമയത്താണ് മനുഷ്യക്കടത്ത് മാഫിയകളുടെ നേതൃത്വത്തിൽ ഈ അപകടകരമായ യാത്രകൾ നടന്നത്. മേഖലയിൽ പെയ്യുന്ന കനത്ത മഴയും വെള്ളപ്പൊക്കവും ദുരന്തത്തിന്റെ ആഘാതം വർദ്ധിപ്പിച്ചിരിക്കാം. ഈ വർഷം മാത്രം ആൻഡമാൻ കടലിലും ബംഗാൾ ഉൾക്കടലിലുമായി മുന്നൂറോളം അഭയാർത്ഥികളെ കാണാതാവുകയോ മരണപ്പെടുകയോ ചെയ്തിട്ടുണ്ടെന്നും യു.എൻ ചൂണ്ടിക്കാണിക്കുന്നു.
മ്യാൻമറിൽ തുടരുന്ന ആഭ്യന്തര സംഘർഷങ്ങളും ബംഗ്ലാദേശിലെ അഭയാർത്ഥി ക്യാമ്പുകളിലെ കടുത്ത ജീവിതസാഹചര്യങ്ങളുമാണ് സുരക്ഷിതമായ ഒരു ജീവിതം തേടി അപകടം നിറഞ്ഞ കടൽമാർഗ്ഗങ്ങൾ തിരഞ്ഞെടുക്കാൻ റോഹിങ്ക്യകളെ പ്രേരിപ്പിക്കുന്നത്.
